港澳埠際賽　郭嘉諾望港將齊打爭氣波

第73屆港澳埠際賽周六（2日）下午3時假深水埗運動場舉行，香港隊一眾如陳港斌、劉學銘等U22成員在謝德謙及夏志明等「大師兄」帶領之下，於主場迎戰正在準備應付亞洲盃外圍賽的澳門隊。港隊教練郭嘉諾表示，期望球員能夠打出爭氣波，以證明自己的實力足以於將來獲選入「大港腳」的陣容之中。

於周六（2日）出戰港澳埠際賽的香港隊，決選名單當中有接近一半為於今夏出戰亞協U23足球錦標賽外圍賽的U22小將，當中包括陳港斌、劉學銘以及林樂勤等球員，而港隊教練郭嘉諾亦希望陣中其餘較少代表港隊上陣的球員們，能夠藉着今仗帶領小將之餘，亦為證明自己的實力而戰：「球隊有好多球員喺U22上嚟，亦有啲有一段時間冇代表香港隊嘅球員，佢哋需要用呢場波去証明自己係值得獲提升上大港腳。就以夏志明為例，我哋一直有留意佢嘅狀態，喺今場波需要好多進攻之下，我哋好快就補選咗佢，而佢亦需要表現自己，令我哋可以為佢投下信任一票，協助佢返去大港腳嘅行列。」

為備戰今場賽事，港隊周四（31日）跟港超球隊理文進行友賽，雖然最後以0比2落敗，但郭嘉諾周五（1日）於完成港隊賽前最後一課操練後表示，對球隊表現感滿意：「其實球隊喺製造入球機會都比對手多，更兩度中柱以及對手兩度護空門，我反而對表現收貨！不過臨門一腳方面需要做得更好，今日（1日）喺訓練都有強調埋門，相信明日（2日）會有好多機會製造到，希望球隊可以把握到所有機會。」對於今夏頻頻與港超球隊友賽的澳門隊，郭嘉諾亦坦言不敢輕視對手：「澳門喺亞洲盃外圍賽作客吉爾吉斯都係僅輸1球，防守做得好好，所以都預計佢哋防守緊密，會製造好多反擊情況，我哋喺呢兩方面都做咗針對性部署，不過最緊要係班年青球員落到場放膽進攻，踢返場爭氣波！」

至於澳門隊方面，則視這場賽事為「寓賽於操」，為即將在9月5日進行的亞洲盃外圍賽第三輪，主場出擊迎戰印度作準備。澳門主教練陳曉明期望與香港隊比賽讓球員重拾比賽狀態：「澳門聯賽正值休季期間，加上球員大多有正職，希望透過港澳埠際賽令球員重拾比賽感覺，亦令教練團睇到球員對戰術嘅理解。」澳門與香港、印度實力上有差距，這位前天水圍飛馬教練明言，打法會較著重防守：「雖然香港同印度喺打法上有所不同，但澳門仍然以防守為主，希望澳門喺港澳埠際賽中能夠做好防守反擊等戰術部署。」上周澳門受颱風「天鴿」吹襲，原訂於8月25日與馬來西亞的友誼賽取消之餘，場地設施亦因而受到破壞，導致球隊接近6日只能作體能訓練，陳曉明慶幸球隊士氣更勝從前：「風災過後，慶幸澳門球員都齊心協力希望將事情做好，士氣甚至比之前更好、更團結。」

第73屆港澳埠際賽 – 港隊20人決選名單：

門將：梁興傑（香港飛馬）、謝德謙（冠忠南區）

後衛：方栢倫、梁諾恆（香港飛馬）、陳港斌、劉學銘（冠忠南區）、謝朗軒（理文）、羅振庭（陽光元朗）、梁冠聰（和富大埔）

中場：蕭俊銘、胡晉銘（香港飛馬）、陸志豪（冠忠南區）、顏樂楓（理文）、劉浩霖、談樂軒（陽光元朗）

前鋒：鄭兆均（標準流浪）、林學曦（東方龍獅）、林樂勤（香港飛馬）、夏志明（冠忠南區）、許嘉樂（理文）

東網體育同你追實體壇每個精彩時刻！