54歲大媽贏小花　創最長乒乓球賽紀錄！

近年提起中國大媽，大家可能已有「既定形象」，但呢位54歲嘅乒乓球員，肯定畀你另一個感覺。盧森堡選手倪夏蓮，於國際乒聯世界巡迴賽奧地利站大發神威，於3度落後下，以總局數4:3反勝19歲日本橋本帆乃香晉級，成場波打咗1小時33分42秒，成有史以來乒壇費時最長球賽。雖然年過半百，曾為中國勇奪世錦賽團體冠軍，但佢賽後話自己仲未夠經驗，表示「學習永不太遲」，打算只要一日仲企到喺度，就會繼續打落去。

雖然已年紀一把，但倪夏蓮依然活力、韌力十足，今仗面對比自己足足年輕35年嘅日本少女，曾落後局數0:1、0:2，之後佢追成2:2後，又試落後2:3，但佢拚盡全力，最後兩局都打到刁時下，打足近94分鐘，以9:11、5:11、11:6、11:6、5:11、16:14及18:16反勝對手過關。賽後倪夏蓮笑晒口話：「呢場波令人難忘，可以贏到真係太好了。呢場賽事入面，我不時把握唔到Match Point，因為我經驗仲係未足夠，但學習永不會太遲。我會繼續學習於賽事中畀多啲耐性，因為我有潛質，仲有改善空間。」

以職業運動員嚟講，倪夏蓮身材當然較為肥胖，但仲係好靈活；於比賽期間打失波，仲會流露出少女般嘅神情，到今仗最後成功逆轉勝，佢高舉雙手大叫Yeah，並同老公攬實咀嘴，真係老得可愛。倪夏蓮之所以正能量爆燈，都係多得佢位瑞典籍丈夫同埋兩個仔女，亦都係盧森堡乒乓球教練。

再不能成為中國隊主力球員後，倪夏蓮於2000年代表盧森堡參加奧運會，其實佢早於1995年，年屆32歲時已經打算退役：「嗰陣教練叫我唔好退休，最後我攞咗歐洲冠軍。然後再打多幾年，都我個女出世後，我又想退落嚟，但之後諗仲係得三十幾歲，應該趁仲郁得時繼續打，之後就打到今日。」

倪夏蓮同瑞典籍丈夫勁恩愛，到今時今日佢仲保持年輕及爭勝心，丈夫功不可沒：「如果唔係佢，不斷支持我鼓勵我，無論贏同輸都同我一齊走落去，我應該早已唔打波。」事實上，倪夏蓮雙腳都有傷患，但佢深愛盧森堡呢個國家，想為乒乓球隊繼續作出貢獻：「只要繼續參加大賽，乒總先至有撥款，才可以繼續營運。」

東網體育同你追實體壇每個精彩時刻！

http://bit.ly/2ecTF2A