【港超專版】CEO梁智駒:我係湊仔公!

20171016
東網電視
更多新聞短片
梁智駒場內場外都係CEO。

CEO,Chief Executive Officer,即是行政總裁。在香港球圈中的CEO,除了足總的薛基輔和理文的馮嘉奇外還有一個,就是今季新軍夢想FC的梁智駒。大部分人心目中的CEO都是位高權重,一人(班主)之下,萬人(其他職球員)之上,但「阿駒」個人則對自己的職銜有另一種睇法:「出糧嗰個就真係位高權重喇,我都係受薪嘅,同球隊上下無分別,職銜嘅嘢名嚟嘅啫。而且各有各職責,有事我會行出嚟,無事就企埋一邊,總之對件事、對球隊好就得!」

自2009年正式掛靴後,昔日港甲「9碼射手」梁智駒,終於在今季回歸香港球圈,出任港超新軍夢想FC的CEO。由於球隊新埋班,「阿駒」坦言要處理的事情遠超預期,但慶幸「兄弟多」得到各方友好出手相助,他說:「由搞個會籍開始,到埋班斟球員、搵外援、借球員,到建立教練團,幾乎所有嘢都係由零開始。初頭都有啲擔心,但好彩我冇嘢多係朋友多,喺大家高抬貴手下,2個月嘅時間,所有嘢都喺最後搞掂晒,真係多謝幫過我嘅每一位朋友。」

「外援買日用品都要湊」

問及在夢想FC的工作,是否一如外界傳聞「梁智駒位高權重,唔使點做」,本來談得興高采烈的「阿駒」,不禁眉頭一皺。「邊個講呀?球隊入邊唔同崗位有唔同職能,我做咩?我咪係『湊仔公』囉!隊中好多年輕球員,有得踢、冇得踢要湊,踢得好、踢得曳要湊,一時要氹、一時要鬧,就連外援球員都要湊,安排佢哋租屋、睇醫生、買日常生活用品,就連搭車都要湊!CEO做乜?咪就係湊仔囉!湊仔會唔會唔使點做呀?」平日操練前後,總會把握機會跟隊中年輕球員和外援溝通的「阿駒」表示。

「阿駒」之前曾在英超球隊伯明翰工作,計眼光、論資歷,在夢想FC可謂數一數二,加上身為CEO,會否插手球隊教練團的工作?「之前我喺《專欄輪住嚟》都講過,能夠同『細榮』(即主帥梁志榮)、『阿冼』(即助教冼家裕)、『Sealy』(即龍門教練鄭皓文)同『文仔』(即技術總監招重文)幾個識十幾廿年嘅舊隊友一齊工作,係一種福氣,我亦好珍惜呢個工作關係,訓練好,比賽好都係『細榮』嘅工作,我唔會指指點點、說三道四,除非佢需要我出聲或者做啲咩,如果唔係我只會企喺後面,做佢背後嘅男人。開季到依家都係咁,大家做嘢都做得好開心。」

癲得嚟有Heart 球員讚奇人

夢想FC之前聯賽曾敗於傑志腳下,有不願透露姓名的球員(擔心被指扒仔)表示,事後「阿駒」不斷緩和隊內氣氛,實施多項「措施」提高球隊士氣,外人未必清楚,但隊內上下卻深深感受到:「佢有時啲行為好癡線,可以玩到好癲,但其實做咗好多嘢,令大家喺隊波入面可以過得開心,我踢過幾隊波,都未遇過咁嘅管理層,佢真係奇人嚟!」「阿駒」則謂或許有人會覺得,他在球隊「搞咁多嘢為乜?」,但許多措施在英超球會都有,而且起到很大作用,那為甚麼不可以在港超球隊施行呢?常說港超球會英超球會無得比,有沒有嘗試提升自己呢?「奇人」提出的問題,值得反思。


萬人迷保母!場外都係CEO

在球隊中,梁智駒這個CEO深受職球員愛戴;球隊以外,他同樣以CEO這個身份,令他大受球圈中好友和他們的子女歡迎。介紹番!「CEO」,Children Entertainment Organiser。

冧爆老友仔女

工作時工作,遊戲時遊戲,平日工作態度認真的梁智駒,與友人玩樂時,永遠是最狂野、最盡情的一個。這點不僅令「阿駒」受同輩歡迎,亦令他成為楊正光、梁子駿、張健峰、李思明和陳偉豪等好友的子女,心目中的「萬人迷」。

由於感情生活長期空白(他自己表示),「阿駒」這位「CEO」平日十分得閒,不時主動或應邀出任保母,接上述好友的子女放學,或為他們在課餘安排節目。有圖有真相,大家看相便知這位「CEO」人氣有多高企喇!「我踢波嗰陣成日幻想有一日,可以拖住自己嘅仔女入場,之後再為佢哋入球,可惜退役到依家,都仲未有女人肯嫁我,咁惟有將我啲愛心,分畀老友嘅仔女囉,一樣嘅啫!『大頭』,使唔使我分啲畀你?」吓?唔使客氣喇啩!

圖/文:大頭(部分相片由受訪者提供)