【港超專版】王威信奇招搞旺球市!!

20171018
東網電視
更多新聞短片
真係得!?

陽光元朗足球會會長王威信(Wilson),本身是執業律師,也身兼區議員職務!不過,曾為香港U19代表的Wilson仍對足球有團火,縱然已「忙到甩轆」仍入閣足總董事局,為本地足壇出謀獻策!王威信直言本地足球賭波沒被合法化,令香港足球落後於鄰近國家,亦令聯賽失去商業價值優勢,被追過是遲早的事,故此Wilson希望政府能夠在這議題拆牆鬆綁,才能把「本地波」真正提升到另一層次!

因幫手成立天水圍飛馬,令王威信在08年開始投身足運,更於09年當選足總董事,見證着近10年本地足運發展。他認為經過「鳳凰計劃」後,足總在架構上已漸趨完善:「足總有咗資源去聘請一啲有特定專長嘅人做適當崗位,董事就做番方向性決策嘅嘢,唔似以前成日插手各項事務,事情就會變得專業好多!另外,董事會亦加入咗好多獨立人士,咁就唔會出現某幾個董事攬權嘅機會,開明咗,管治亦會改變!」

「唔通股票有造市就禁買賣?」

不過,Wilson認為要進一步令香港足球得到提升,「賭波合法化」會是重要的一環:「依家本地足球畀外國波搶晒風頭同注意力,其中一個原因係可以賭博嘅分野!事實上,相比起鄰近國家,我哋呢方面已落後好多!試問香港球隊失去咗呢啲商業價值優勢,又點同鄰國嘅足球競爭呢?被超越係無可厚非!」

每當提及「賭波合法化」,不少人都會將它與「打假波」掛鈎,王威信亦有其見解:「其實如果要做非法嘅嘢,有好多方法可以做!唔通香港因為股票市場有內幕交易同造市,就要禁絕股票買賣?我哋要做嘅,係諗方法去解決問題,而唔係『斬腳趾避沙蟲』!」

串外國賽事減打假波機會

王威信又說:「其實我所講嘅賭波合法化可以有好多方式,亦都可以循序漸進去賭。可唔可以用多場式彩池呢?例如將幾場外國波再夾幾場本地波串埋一齊做個『六環彩』,咁樣不法之徒就唔能夠好似單場咁容易去操控賽果,大大降低誘使『打假波』風險!」Wilson亦指出當本地波有得賭,球會商業價值自然飆升,隨之球員薪酬待遇亦會提高,令誘使「打假波」變得較困難。

要推行「賭波合法化」定必遇上重重阻力,問及已生活富足的王威信,為何要「攞苦嚟辛」去推動一個本身與其無關痛癢的圈子,Wilson笑言也有私心:「只要有一日香港足球做到產業化,自然造就更多機會畀年輕人!佢哋可以發揮才華,又多一條向上流嘅出路,社會就會和諧啲、怨氣都會少啲!老實講,我嘅產業都係扎根香港,如果社會和諧,人人安居樂業,對我自己亦都係一個保障!如果香港衰,大家都輸,所以一定要改善社會氣氛!幫人亦都幫自己,何樂而不為呢?」