【港超專版】陳文俊教你點做真‧球場Boss

要數到香港頂級聯賽近年表現出色及穩定的球隊，冠忠南區必定是其中一隊，近5季有4季打入前4，雖然這支地區球隊沒有奪得任何錦標，期間更曾於港超聯成立首季自降甲組作「冷靜期」，然而作為球會主席，陳文俊認為要確保走上軌道，球會要先建立良好架構！

南區自從升上甲組後，便連續兩季在頂級聯賽取得第4名，出戰港甲首季更有教練馮凱文獲選年度最佳教練，不過該隊卻在港超聯成立首季避戰一季，陳文俊解釋是為了將來能夠走更遠的路：「其實點解要停咗1年再上返嚟？我哋就係想定落嚟，頭兩年喺港甲，你要搵幾百萬贊助都要周圍撲，雖然球員好想留喺度，但你畀唔到任何承諾佢，呢個係唔健康嘅現象。我認為呢一步做得正確，正如前蘇聯領導人列寧嘅名句－－『One step backward, in order to take two steps forward』退後咗一步，但之後會行前兩步。」

傾成5年贊助穩定軍心

對於球隊的發展空間，陳文俊表示多得好友兼會長黃良柏同意為期5年的贊助，間接令球員毋須為前程費神：「我哋落去港甲一年，當時同贊助商有默契，就係我哋起碼合作5年，無論對贊助商抑或球隊管理層、球員或球迷都好，可以有一個合理嘅時間，每5年作一次檢討。我哋大部分球員多數一簽簽2年合約，呢3年時間我哋都有不斷同球員續約，唔會去到季尾5月先開始同球員傾合約。雖然最初有人擔心呢個5年計劃唔成功，依家證明冇問題啦，問題只係在於有幾多個5年啫！呢個安排對球員，對球會都好，起碼人才少流失，我哋升返上港超聯到依家，骨幹冇乜大變化，所以有個5年合作計劃嘅基礎會好啲。」

大讚球癡拍檔鄭兆聰

雖然曾經在賽前記者會表示，期望今季是南區的「收成期」，但陳文俊亦坦言，運氣在足球世界裏影響不小：「其實要維持到一隊波嘅成績係有壓力嘅，因為冇錢就萬萬不能，有錢都唔係萬能，呢個就係最蹺妙之處。我有Ricky（教練鄭兆聰）呢個好好嘅拍檔，我對佢好信任，佢簡直係球癡，每日對住部電腦，入面全部都係足球嘢，你好少會見到一個人咁投入去做一樣嘢。講到成績，運氣絕對不可少，尤其係傷病。香港地搞波最頂癮嘅地方，就係用最有限嘅錢，去做到最多嘅嘢，我哋驚前鋒蘇沙會受傷，所以簽加洛斯，但佢嚟到香港未好過，傷足咁耐，所以有時真係講運氣，套用一句老話，『謀事在人，成事在天』啦。」