英超　朗尼複製金球　兵工廠反啅拖肥

即上英超刨績王：http://win.on.cc/epl　

奧燒激罕頭槌為雲爺爺賀壽！英超頭場「拖肥糖」愛華頓老將朗尼雖入靚波，重演15年前為母會射爆廠嘅神迹，但阿仙奴核心奧斯爾施展激罕頭槌建功兼助攻，協助兵工廠作客反勝5比2嗒「糖」，用今季聯賽首仗作客贏波，慶祝主帥雲格68歲牛一。

2002年10月19日，當時未夠17歲嘅愛華頓新星朗尼，後備入替於完場前轟入世界波以2比1射死衞冕嘅阿仙奴，終止對方跨季30場聯賽不敗紀錄，之後轉投曼聯贏盡多項球會級錦標，仲成為英格蘭國家隊史上士哥王。今季朗尼重返「拖肥糖」，適逢佢「一球成名」15周年再鬥兵工廠，開波僅12分鐘，伊祖沙古爾喺中場拍甩咗格列沙加個波，朗尼即刻喺禁區外遠射靚波先拔頭籌，同15年前嗰球確有異曲同工之妙。

其後阿仙奴控制大局，40分鐘格列沙加將功補過，佢喺禁區外放冷箭被主隊門神比克福特救出不遠，蒙利爾及時執死雞扳平。上仗聯賽輸畀屈福特門前失機嘅阿仙奴中場奧斯爾，喺53分鐘罕有地施展頭槌頂破比克福特。冇耐伊祖沙古爾兩黃一紅被逐，打多個嘅阿仙奴，再由「奧燒」助攻畀拿卡錫迪射成3比1，末段艾朗藍斯、A山各建一功，協助「兵工廠」今季聯賽首次作客贏波，絕對係尋日主帥雲格68歲生日嘅最佳禮物。

愛華頓又輸1場，領隊朗奴高文個帥位危危乎，有傳高層會請番老友鬼鬼嘅「天才」莫耶斯回巢收拾殘局，曾執教愛華頓11年嘅「天才」，早前仲特登婉拒蘇格蘭國家隊嘅邀請，食回頭草一啲都唔奇。

東網體育同你追實體壇每個精彩時刻！　

http://bit.ly/2ecTF2A