【有片】總結：格芬「飛越艾菲爾鐵塔」
20171025
東網電視
更多新聞短片
格芬喺高拔封阻前大力入樽。(互聯網圖片)
快艇喺NBA主場以102:84擊敗爵士，失去基斯保羅後反而開季3戰全勝，認真估佢唔到，比賽期間「新船長」格芬更加喺來自法國嘅高拔封阻前，施展隔人暴扣，被喻為可能係今季最佳入樽，傳媒甚至形容係飛越艾菲爾鐵塔添！
其實爵士曾經喺第2節追近分數，不過始終喺第3節被甩開，而且最令球迷尷尬嘅係，高拔喺第1節中段成為對手嘅表現背景，當時格芬喺外線快速擺脫列比奧後，大步殺入籃底，再趁高拔起跳封阻前施展隔人暴扣，搞到主場球迷靜晒。
雖然有球迷覺得，當時格芬左手有推人動作，疑似犯規，但既然球證冇吹罰，傳媒自然將呢下入樽吹到上天，形容格芬飛越艾菲爾鐵塔，佢全場有22分、9個籃板同6次助攻，帶領快艇繼續贏，就算高拔有12分、7個籃板同2次助攻，都救唔到爵士。
同日，騎士喺主場以119:112擊敗公牛，由於新加盟嘅湯馬士同戴歷羅斯分別因傷缺陣，勒邦占士被安排以控球後衞出份出戰，結果佢上陣37分鐘，取得34分、2個籃板、13次助攻同3次搶截，包括3分6投4中，足夠騎士重響勝鼓。
最新賽果(左方主場)
騎士 119:112 公牛
魔術 125:121 籃網
塞爾特人 110:89 紐約人
木狼 107:130 溜馬
拓荒者 103:93 塘鵝
快艇 102:84 爵士