【港超專版】貼地足主蔡尚圻Gary

20171025
東網電視
更多新聞短片

正所謂「兄弟齊心其利斷金」,和富大埔上季成績不俗,勇奪菁英盃冠軍,今季季初成績更令人對球隊有所期待,全靠一眾球員努力之外,統領大埔兄弟幫的蔡尚圻(Gary)功不可沒。Gary自小接觸足球,深明球員承受的壓力,閒時會跟球隊操練,與球員打成一片,更是大埔預備組球員,稱得上「最貼地足主」。

圖:何彥霆 文:胡恩晴

曾經出任公民足球部主席的蔡尚圻,2016年與李志堅(堅Sir)入主和富大埔,「搞波」一搞便是7年時間,上季與好拍檔「堅Sir」為大埔街坊帶來獎盃,Gary表示「堅Sir」是最親密戰友,大埔一眾戰將,是自己的親生「囝囝」:「球場內嘅事我幫唔到幾多,我亦相信『堅sir』同教練團隊嘅專業。但係球場外做到就做,作為大師兄會同佢哋交流心得,分享吓經驗。講真,無話最錫邊個,當你覺得廿幾個大男孩都係自己親生仔,就唔會諗錫邊個多啲,所有人都一視同仁,好似一個大家庭咁,每一個都對我哋好重要!」

「囝囝」進步緊要過成績

見到一班「囝囝」生性,Gary最感欣慰:「始終資源、資金有限,做到咁嘅成績當然高興。但令我最開心嘅唔係捧菁英盃冠軍,或者今季有無機會拎聯賽冠軍,而係見到一班『囝囝』有進步,好似黃威、『樂仔』(陳俊樂)等愈嚟愈有大將之風,呢啲先係我最大收穫。」

Gary球員年代司職進攻中場,於綠茵場上衝鋒陷陣,因此特別明白球員嘅需要,夠晒貼地,他說:「呢啲唔應該由我講,要問球員。不過,我好少因為一場賽事贏輸而畀壓力佢哋,最重要係佢哋發揮到自己。喺香港做運動員、球員絕對係追夢者,想要穩定收入,隨便出去搵份工,都好過做足球員。但你行得呢條路,一定要發揮自己,呢個係我對佢哋嘅要求,比得到咩成績更加重要。」

大埔球員老闆+朋友+隊友

大埔每有比賽,Gary都必定現身支持,但原來這位「貼地足主」入場之餘,平日一有時間還會跟操兼披甲上陣。Gary現為大埔預備組球員,雖然是球會主席,但他笑言自己落場,球員不會「就住踢」:「我係球員老闆,但除此以外,我同佢哋都係朋友, 甚至係兄弟,如果我落場更加係隊友。落到場就唔會再計較大家身份,大家都係球員,踢波嗰時佢哋會照省埋嚟!」


轉個角色延續足球夢

Gary自8歲到體院足球部受訓,後來因到外國留學放棄足球。回流後受體院隊友黃耀富、陳偉豪邀請贊助公民,未足30歲便出任足球部主席。2016年與李志堅(堅Sir)入主和富大埔,繼續以另一身份延續自己的足球夢:「過去幾季因有拍檔協助,參與的確較少,但嚟到大埔好多日常營運都要自己落手落腳做,將之前學到嘅實踐出嚟。好多人都話拎同一舊錢投資其他嘢,回報可能更高,但足球帶畀我太多,雖然我已經返唔到轉頭,做唔成球員,但希望以另一身份延續我嘅青春。」