【港超專版】遇上她和他 楊賜麟湊仔為樂

20171101
東網電視
更多新聞短片

曾經有得玩第一個舉手但又最遲走,兼是本地球圈「爛玩」、「爛蒲」和「爛劈」三個界別的Icon,但自從有了老婆Marble和囝囝「景桓」,「她」和「他」的出現令「無腳雀仔」從此不再翱翔天際。「我依家最大嗜好就係湊仔,睇住佢一日一日長大,感覺好特別。去玩?做咗老公唔敢!做埋老竇唔想囉!」跟兒子一個餅印的「賜B」楊賜麟打趣道。

2000年在流浪青年軍向職業足球夢進發的楊賜麟,今季由香港飛馬外借到標準流浪,據聞乃由「賜B」主動提出。「其實畀着以前,有無得出場唔緊要,有糧出咪得囉!冇錢冇得去玩就大件事喇!但自從結咗婚、個仔出咗世,我自自然然會為未來打算,我意識到如果繼續坐多過踢,今季之後想球會同我續約,或者其他球會搵我都好難。所以的起心肝同『光哥』(香港飛馬主帥楊正光)講,多謝佢肯借我出去,我會畀心機踢。」

餵奶沖涼No Problem!

「賜B嫂」Marble任職空姐,平均每星期都有3、4天要離港工作,起初都曾經擔心「大BB」照顧不到「小BB」,她說:「朋友成日講笑話我有兩個仔(『賜B』和『景桓』),其實依家照顧『景桓』主要都由『賜B』負責,餵奶、沖涼、換片、氹佢瞓,全部都難佢唔到,我可以好放心咁返工。」某人獲愛妻稱讚後一臉得戚。

由於家住打鼓嶺塘坊村,對「賜B」來說,平日無論操練定比賽,來來回回總是山長水遠,故現身為人父的他,收工之後總會第一時間回家,原因只得一個,就是:「我好掛住個仔,雖然家中有長輩幫手照顧,但我每日都好想抱吓佢、同佢沖涼同佢玩,我同人講我依家嗜好係湊仔無乜人信,係真o架!」千真萬確!訪問當日拍攝過後返抵塘坊村,一步入家門,只見「賜B」極速安排好為「景桓」沖涼的架生,全程不假手於人,全自動操作,如非經過長時間訓練,絕無此效果。果然,「賜B爸爸」成熟了。

「景桓」本月8日才14個月大,「賜B」替他沖涼時,他可清楚說出手中的「鴨鴨」,卻仍未懂得講「爸爸」、「媽媽」。「我同Marble依家成日同佢一齊,好期待佢快啲識得叫我哋,相信同好多做咗爸爸媽媽嘅朋友講嘅一樣,嗰一刻會好感動。」整天湊仔為樂,難道是擔心錯過動人時刻?