好勝風之女 陳晞文：再無嘢輸唔起
20171110
東網電視
更多新聞短片
跌過、痛過、失去過，26歲「風之女」陳晞文在不足10年的全職生涯中，由世青冠軍、亞運金牌，到重創瀕死、痛失奧運資格，歷盡「天堂與地獄」游走的滋味。想過離開，但因運動員天生「好勝」的特質，亦為一個尊敬的「她」令晞文繼續揚帆出海……正如小妮子所言「已經無嘢輸唔起」，能夠活在當下，做好自己，盡情享受碧波中飛翔的「真．樂趣」。
■文︰李芷韻 圖︰袁志浩
2017年尚有不足2個月，就要寫入史冊，晞文今年世界賽攞第10、歐洲賽獲季軍，至上月的日本世界盃首奪冠軍，世界排名跳升上第4，這一年的成績表相當「靚仔」，無疑對曾一度想過離開的她再次給予自己肯定：「我之前無諗過世界盃會攞獎，更冇想過返香港有咁大迥響，朋友間、傳媒界都讓我知道原來這個冠軍對我，同埋Team都係重要。」
失落里奧資格「呢世最唔開心」
眼前的喜悅與一年前失卻里約奧運資格的心碎，實在是天與地的差距，晞文對當時痛失入場券的一刻仍然歷歷在目：「我記得2016年2月以色列世界賽，輸咗俾盧善琳，我就知道自己無得去里約奧運，係超級超級……超級唔開心，應該係呢一世人（直至現在）最唔開心嘅一次。」
「我一路以嚟都算平步青雲，好多教練及朋友都同我講，無諗過我會輸，我自己亦可能太自信，無想過選拔賽嘅準備，4年以來我只係諗住去到巴西點樣比賽、點樣去爭獎牌。」猶如跌落18層地獄，既然失去爭上奧運獎牌的機會，晞文想過離開風之隊，重返校園升讀 HKU，畢竟學位延了一年又一年，但在最後要下決定的一天，遇上一位她生命中不會忘記的人：「我好記得那一天，教練要我決定去或留，一個機緣巧合我重遇一位中學老師，係我中一的班主任，亦教我英文，我本身好鍾意英文，佢都好錫我……」
為患癌恩師重新上路
「當日我哋喺地鐵交收一本書，同Miss講起我嘅難題，要喺當日做決定，傾咗短短10分鐘，佢叫我繼續玩，趁依家仍有成績，讀書遲啲都得，加上大學都支持，佢仲話若果呢刻停咗training，要返轉頭就好難，要重返頂級Level更難。呢次見面亦係我哋嘅最後一次……原來佢有cancer，喺8月（2016年）就過身了。」晞文覺得能夠重遇這位恩師，再做了繼續當運動員這個決定，是現在每日去訓練的其中一個動力，因為要繼續做好自己，更不想辜負上天的她。
不經不覺加入了港隊12年，晞文轉任全職運動員亦踏入第9年，回想自己全職生涯的「前半生」都算是一帆風順，但想不到自從失落奧運資格後至今，這段時間是她最開心的時刻：「可能係反差好大，我覺得喺呢段時間自己開心咗、放開咗好多，或者無乜嘢可以比輸Selection更痛。」性格較為文靜的晞文坦言，滑浪風帆雖然曾令她斷了5條肋骨、切去脾臟、傷痕累累，但當中所得到的比起所謂的「犧牲」，收穫更多。
1996年李麗珊在奧運會贏得香港的首面金牌，自覺目前實力介乎世界5至8位的晞文仍盼有朝能夠為香港踏上奧運頒獎台︰「我係想去奧運，相信每個參加奧運嘅運動員都有呢個目標，終極目標係企上頒獎台，但我覺得呢一天要天時地利因素嘅影響，去到最後得唔得？攞咩獎牌？有幾分係天意。」
「飛」足18年一樣刺激
9歲開始玩滑浪風帆，轉眼間快將18年，當年喜愛風帆的自由，如在大海中無拘無束的「飛一般感覺」，現在依然不變︰「滑浪風帆唔使動力，只靠風速度都可以好快，好似飛嘅感覺，同一班朋友出海，更好似一齊飛車咁刺激。」仍是一臉童真的笑容回答，退？又怎捨得離去！
玩得又讀得高材生愛寫作
過去很多人直覺運動員都「讀唔成書」，但陳晞文肯定是「玩得又讀得」的代表。這位會考考獲27分的高材生，除風帆以外的另一個嗜好就是閱讀。Hayley坦言，睇書是一個為她比賽減壓的良方，她年幼很喜歡寫文章，特別是英文文章，但自轉全職後執筆機會也不太多︰「近排喺日本成日睇村上春樹嘅書，我都有買歐鎧淳嘅自傳，反而我自己好想寫一本好入骨嘅小說。」雖然晞文這本「入骨小說」面世需時，作家夢卻未有「hold住先」！晞文透露有朋友提議她先推出散文︰「其實我一直都寫好多日記，或小文章，我現在已有幾篇，只差未投稿，希望12月冬訓可以有時間。」
以「風之后」作為目標
同時，作為風帆運動的一分子，當然有睇過「風之后」李麗珊的自傳，當中亦在這位兒時偶像身上有所領悟︰「我睇過兩本關於珊珊嘅書，佢嘅成績係刻苦練番嚟。」
「風之后」的成就仍是晞文的目標，但在訓練上會加入新元素。「阿英好多時帶我哋去踩越野單車，又會跑山做訓練，依家訓練多元化好多，好多外國頂級帆手都玩好多唔同項目，因為風帆好考反應，依家我哋唔單止要係勤力嘅帆手，亦要係醒目嘅帆手。」
再認識「風之女」
•英文名叫Hayley Victoria，隊內多數叫「晞文」。比賽帆號為HKG5。
•3歲時與父母在英國生活3年，對英國文學尤其鍾愛。
•因患哮喘而開始學玩風帆，當時年僅9歲。
•獨女，父母均為護士，但因「心痛」故媽媽從未為女兒打過針。
•中學就讀瑪利諾修院學校，2008年會考考獲27分，其中英國文學、英文及地理都為A等。
•會考後休學轉為全職運動員，後來憑運動及學業的優異成績，獲香港大學破格取錄，2010年入讀了文學院1年。
•奪得2009年世青賽冠軍，一戰成名。
•2009年香港東亞運動會開幕禮的火炬手之一。
•在一邊讀書一邊訓練下，出戰2010年廣州亞運會，取得女子帆板米氏板銀牌。
•在選拔賽力壓師姐陳慧琪，奪得2012年倫敦奧運資格，首次踏上奧運舞台。
•但在出戰倫奧前的測試賽與49er的帆船相撞，嚴重受傷，5條肋骨骨折，脾臟破裂更要切除。惟復原極快，不足一個月即出戰奧運。
•2014年再戰仁川亞運會，在女子RS:X組別10場全勝奪金，是李麗珊之後首次。
•2016年2月的以色列世界滑浪風帆錦標賽，總成績排第12，由於成績不及隊友盧善琳，未能代表香港出戰里約奧運會，一度考慮重返校園，退出揚帆行列。
•2017年10月在日本舉行世界盃，帶傷上陣下在獎牌戰表現超水準，力壓強手首奪冠軍。
•現隨剛升任總教練的陳敬然（阿英）訓練，她希望可以追平阿英兩奪亞運金牌的成績。
•啟蒙教練是前港隊代表陳凱旋，偶像是李麗珊，而且黃德森曾任其教練，一直都記住以「阿Sam」講過的「勝不驕、敗不餒」為座右銘。
東網體育同你追實體壇每個精彩時刻！