騎士絕地反擊　大帝差啲做「三雙」

勒邦占士又做救世主！騎士作客紐約打得激烈，一度落後23分陷於劣勢的騎士，神奇逆轉以104比101擊敗紐約人，取得兩連勝。「大帝」勒邦占士差啲做出「三雙」，為球隊貢獻出23分、12次助攻及9個籃板球，其老拍檔韋迪則入15分及8個籃板，全隊在最後一節取得45分，將劣勢大逆轉。

騎士首節都能勉強對抗，初段曾領先12比6，但一度在四分鐘內一分都冇，勒邦占士在這一節連取四分，首節以25比22領先，但隨後騎士陷入困境，五分鐘內只入一球，加上紐約人打出一波18比2的攻勢，半場騎士已落後38比51，進入第三節騎士仍然手風麻麻，僅勒邦占士有遠投射中，但仍被對手拋開；直至最後一節，騎士要絕地反擊，「大帝」又攻又守，將比數拉近，餘下３分鐘左右追近落後兩分，再於完場前1分23秒，勒邦占士在嚴防下三分得手，助騎士反超前100比97，再加上隊友不斷外投成功，最終騎士以3分力壓對手贏波。

東網體育同你追實體壇每個精彩時刻！