轉新Look洗衰氣？舒拉寶娃涉行騙被控
20171121
東網電視
更多新聞短片
咩話？俄羅斯網球天后舒拉寶娃涉行騙被控呀！話說有位印度律師派殊星向傳媒爆料，話呢位5次女網大滿貫得主涉嫌因為參與一個印度樓盤騙案，最終呢個樓盤項目呃咗成班買家每人數以百萬計美元後，但就爛尾起唔成，因而令「舒娃」被控。據知，印度警方家陣已經初步向有關發展商Homestead Infrastructure Development提出起訴，而身為嗰個樓盤代言人嘅「舒娃」，亦會係被告之一。唔知係咪覺得衰氣纏身，「舒娃」日前同老友飯局開P，都換個新Look出現，仲擺埋相上社交網，嚇Fans一跳呀！
講番個樓盤騙案，根據資料，原來30歲嘅「舒娃」，喺2012年曾經去到印度參與宣布一個新樓盤計劃，「舒娃」仲幫個樓盤命名做Ballet，而發展商則向一眾潛在買家宣傳話，樓盤會包含一個網球學院、會所同直昇機停機坪，總之係應有盡有，超高質素啦！仲有，喺個樓盤網站仲引述「舒娃」嘅展望：「要令業主們感到所擁有的是與別不同！」
負責代表其中一位樓盤買家提出起訴嘅律師派殊星話，呢個位處印度新德里衞星城市古爾岡嘅新樓盤，原定係喺2016年完工，點知發展商喺收到買家幾百萬美元之後就玩失蹤，令建築工程被逼中途暫停。派殊星認為「舒娃」要負起部份責任：「其實當任何名人幫任何產品代言，佢就已經係該公司代理人之一。始終個樓盤如果唔係涉及舒拉寶娃個名，真係搵鬼買咩！」
據知，有關案件將會喺新德里法庭開審，而印度警方暫時就未有作出回應，至於相關發展商同「舒娃」都係唔肯作出任何評論，各位花生友唯有繼續密切留意最新消息啦！
東網體育同你追實體壇每個精彩時刻！