【港超專版】「千禧BB」于楊子承父夢

20171123
東網電視
更多新聞短片
「千禧BB」于楊子承父夢。

於上月冠忠南區迎戰標準流浪的菁英盃賽事,年僅16歲的于楊在79分鐘後備入替,雖然無法為冠忠南區扭轉敗局,但2001年出生的他,卻創造歷史成為首位港超上陣「千禧後BB」!這位「學生哥球員」球技了得全因流着父親于文偉「足球之血」,但不同的是當年父親雖受郭家明器重,卻因祖母極力反對留下足球遺憾!故于楊今次「子承父夢」,可謂一解父親多年的心結!

●圖/文:司徒子文

作為本地球壇首位於頂級賽事上陣的「千禧後BB」,于楊其實早已在各青年賽事鋒芒畢露,曾代表港青對澳門、中華台北大演「帽子戲法」;今季加盟冠忠南區後,於預備組2仗包辦球隊7個入球……這些都是這位「明日之升」傑作!

兩仔爺食飯講運動營養學

問及為甚麼球技會這麼出眾,于楊直言與父親有關:「細個嗰陣老竇成日帶我去踢波,喺佢提點下又踢得幾好,兩仔爺嘅話題總離唔開足球,甚至阿媽都投訴過點解食飯嘅時候,都要講運動營養學!」

誠如網上潮文《如果美斯是在香港出生》,「港爸港媽」對兒子以足球為職業大多持反對態度,但于爸爸反而身體力行地支持!于楊就解釋爸爸本身正是這種思想的受害者:「當年老竇16歲就畀郭家明睇中,選佢入隊代表香港青年軍遠征歐洲,返到香港仲得到唔少球會招攬;但嫲嫲就極力反對,令佢到依家都留有遺憾!可能老竇唔想我似佢咁樣,所以一直都鼓勵我想做就去做,老實講自己讀書唔叻,但就喺球場度搵到滿足感,令我更有動力向前衝!」于楊坦言今年能夠加盟冠忠南區做職業球員,又能夠在菁英盃上陣,總算一解父親多年心結,兩父子一起圓夢!

華仁中四生練完波趕補習

雖然在于楊心目中,暫時將足球放第一位,但並不代表完全放棄學業!現為香港華仁書院中四生的他,已與校方達成共識,利用假期或體育堂時間「走堂」到球隊受訓,操練後就要趕去補習。于楊直言這生活捱得很苦:「自知唔係讀書材料,但亦明白要盡學生嘅本分!所以無論幾忙都好,都要日趕夜趕去補習溫書做功課,希望做到科科合格,讀完中學升大學,就好似陳俊樂、陳港斌咁讀得又踢得就完美!」談到足球場上的目標,于楊更清晰地說:「18歲前喺球會爭到正選位置,20歲前做大港腳,24歲前衝出香港到外地球會搵食!」

對於自己成為首位「千禧後BB」在本港頂級賽事上陣,于楊期望再有下次:「我落場十幾分鐘無乜建樹,因為球隊落後緊,啲波都只係斬來斬去搶攻。希望下次再有機會嘅話,我可以放膽啲攞波去證明自己!」

拜仁受訓學專業「咪吓吓再嚟多次」

本身為「太陽」青訓產品的于楊,多年來得到陳振宇、丘建威、陳志康等教練悉心教導!今年暑假更參加了少年足球營,獲選成唯一可飛赴德國拜仁慕尼黑、與全球50多個國家及地區球員一同受訓的香港代表。當中更在射球能力測試成為球速範疇第2名,實力獲肯定。

對於今次德國之旅,于楊認為外國球員的態度值得學習:「佢哋會當足球係專業,平時訓練係唔容許犯錯,一有差錯就會鬧到飛起,同香港『唔緊要、再嚟多次』好唔同!其實咁先練到球員『在意』啲細節,到比賽時就無咁易犯錯!同埋喺外國球員眼中,足球就係一切,所以會用盡最專業方法去維持自己『生計』;香港球員就相對多出路,唔踢波可以考慮做紀律部隊,因此對足球去得唔夠盡!」

于楊亦表示在冠忠南區隊友列文身上,領略到敬業精神:「練波佢永遠最早到球場,而且非常認真,練完之後又會加操最遲走。呢個亦係佢能夠喺唔同國家聯賽,都可以有好表現嘅原因,我要好好學習!」