世盃分組賽6大戰役 嘜定時間睇波!

20171202
東網電視
更多新聞短片
(互聯網圖片)

俄羅斯世界盃2018,於香港時間尋晚進行抽籤儀式,32路雄獅分組賽前途塵埃落定,其中英格蘭、巴西、法國籤運極佳,三獅兵團分組賽最大敵人只係比利時,巴拿馬及突尼西亞應不足為患,巴西及法國,只要通過瑞士及丹麥嘅考驗,小組首名將手到拿來。衞冕德國要面對墨西哥、瑞典及南韓挑戰,小組晉級不難,但亦須打醒精神。葡萄牙及阿根廷墮「硬嘢之組」,前者要惡鬥西班牙,藍白兵團則遇上克羅地亞、尼日利亞及冰島,表現稍為慢熱都有麻煩!

今次抽籤強弱頗為平均,雖無死亡之組,不過絕不乏可觀或話題之戰。今次就選出小組6大必睇戰役,並附上開波時間,方便大家嘜定時間睇波。

1.俄羅斯Vs沙特阿拉伯,6月14日晚上11點開賽
主辦國俄羅斯今次抽得絕世好籤,但唔代表球隊冇壓力,如果咁都出唔到線,相信都難平當地民憤!今場係2018世盃開幕戰,全球肯定熱血沸騰,雖然戲碼唔算強,但唔睇都幾難有話題。睇番依家兩軍世界排名,俄軍(65位)比沙特仲要低2位,如果第1場沙特就爆冷贏波,球迷肯定High爆。

2.葡萄牙Vs西班牙,6月16日凌晨2時開賽
毫無疑問屬今次世盃分組賽最強戲碼,葡萄牙隊長C朗,惡撼皇馬隊友沙治奧拉莫斯、艾斯高等,已經夠晒睇頭;面對巴塞老對手恩尼斯達、布斯基斯、碧基、佐迪艾巴等,要打出水準唔易。葡萄牙於近年大賽屢遇狂牛國,西班牙先於2010世盃淘汰對手,2012年歐國盃亦於四強勝出,最後都取得錦標,心理上佔得優勢。

3.冰島Vs阿根廷,6月16日晚上9時開賽
矮仔對巨人嘅神話式對戰,相信非美斯或阿根廷擁躉,都希望冰島可以再次引發奇迹,繼2016年歐國盃後再創佳績。舊年冰島擊敗英格蘭、打和葡萄牙,超忠心球迷團令人留下深刻印象,呢班波Nothing to lose,今次對賽壓力無疑喺阿根廷身上。藍白兵團於今次外圍賽幾被迫至絕路,好彩仲有美斯及時爆Seed;球王質素毋庸置疑,但一眾星級隊友,踢國際賽始終發揮於水準以下,如果今場贏唔到,對克羅地亞及尼日利亞,將要面臨更大壓力。

4.巴西Vs瑞士,6月18日凌晨2時開賽
唔係話瑞士有機會威脅巴西,而係純睇「森巴兵團」有幾犀利。4年前巴西憑地利成為捧盃大熱,但輸畀德國七個一皮叫人歷歷在目,之後巴西就進入小低潮。但繼尼馬愈踢愈好,菲臘比古天奴、加比爾捷西斯、卡斯米路大熟大勇,「森巴兵團」戰鬥力已遠勝上屆世盃決賽周。尼馬究竟有幾大潛力,可以帶巴西於俄羅斯去到幾遠,今戰可見端倪。

5.德國Vs墨西哥,6月17日晚上11時開賽
衞冕冠軍德國,近年成大賽捧盃大熱,球隊球星如雲,板櫈深度之厚可謂32強之冠,領隊勒夫經驗豐富,相信日耳曼兵團可持續強勢。墨西哥擁有「小豆」查維亞靴南迪斯及杜斯山度士等,有一定戰鬥力,於小組首戰可望與德國拉得比較均勢,相方主攻踢法亦可望令球賽更有睇頭。

6.英格蘭Vs比利時,6月29日凌晨2時開賽
於香港有勁多球迷嘅英格蘭,上屆世盃分組賽出局,令唔少擁躉勁失望,但近年三獅兵團用熱刺班底:哈利卡尼、迪利亞里同艾歷迪亞等做主力,的確打出唔錯表現,又令英躉再見曙光。本地三獅躉多,英超迷更多,今場英軍對手比利時,擁有一大班英超球星,夏薩特、盧卡古、奇雲迪布尼、費蘭尼、維頓漢、艾達韋列特個個獨當一面,呢次英超對英超,大家又點可以錯過?