【港超專版】許嘉樂冧女友一味靠「拋」

20171213
東網電視
更多新聞短片
許嘉樂冧女友一味靠「拋」!

常說「要抓住男人心,要先抓住男人的胃」,但效力理文的許嘉樂卻懂得「以彼之道,還施彼身」必殺技,苦練煮製女友Joeby為自己設計的「愛心薄餅」,冧爆這位深受網民熱捧的「AA制女神」!

圖/文:司徒子文

談到有關港超聯的「飲食」題目,又豈可缺少「嘉樂仔」女友Joeby呢?皆因Joeby曾在接受媒體街訪時,直言女士也有經濟能力,絕不介意食飯與「許先生」AA制,讓網民拍案叫絕冊封為「AA制女神」!當大家也在「葡萄」許嘉樂有如此明白事理的女友時,原來「嘉樂仔」也花了不少功夫才抱得美人歸,撒手鐧就是如謝霆鋒般入廚,絕招是拋鑊整「愛心薄餅」!

以彼之道還施彼身

在眾多美食之中,為甚麼選「愛心薄餅」?「嘉樂仔」的解釋也令人十分「葡萄」:「Joeby煮嘢食好叻,拍拖無耐,佢就為我度身設計呢款薄餅!佢知我一向鍾意食『手抓餅』,與其喺街買貴嘢,不如自己研製個簡化版嚟做啦!結果Joeby去葵涌廣場啲小食檔偷師後,就整咗呢個有蛋、有芝士,好飽肚令我踢波充滿力量嘅『愛心薄餅』出嚟!個餅咁易整,我就跟佢學,學識咗又整番畀佢食,都算係『交流』啦!」

美女廚神畀男友滿分

「嘉樂仔」有3個家姐,自細起居飲食都有阿媽照顧,令生活在女人堆的他,廿多年來都從不下廚。但為了氹女友開心,「嘉樂仔」也甘願做勇者:「做男人乜都要識啲,學多啲嘢試多啲嘢先叫型!因為Joeby好鍾意食甜嘢,近排我哋就研究緊點去整『梳乎厘』,雖然都係失敗收場,但過程當中我同Joeby一齊研究食譜,都算係情趣嘅一種!」Joeby直言懂得下廚的男士可加80分,難怪在女友心目中,「嘉樂仔」是一位滿分情人!

本是中學同學,畢業後才發展成情侶的二人,言行舉止總是帶着甜。問到男友作為足球員,前途未必得到穩定的保證時,Joeby再次顯示出「AA制女神」風範表示:「我鍾意嘅係佢夠寵我、佢嘅專一,又唔係鍾意佢嘅收入!只要佢實現到夢想,一齊承擔『將來』又有咩所謂呢?」


為踢好波戒凍飲

作為職業球員,要保持最佳狀態,注重飲食是相當重要的一環!許嘉樂也自言經過之前兩年效力流浪的歲月,現在已戒了「凍飲」習慣:「以前嘅我可以話係『無凍不歡、無辣不歡』,每個月有6、7次『雞煲』,搞到成日肚痛,有時真係屙到面都青埋。但做咗職業球員後,自覺要開始保養身體,就開始注意飲食。依家我已經戒咗飲凍嘢,連訓練同比賽飲嘅補充劑都係唔凍。另外都食少咗好多唔健康嘢,咁樣令到身體得到明顯改善,亦舒服咗好多。」

談及今屆理文開季表現未如理想,但「嘉樂仔」表示仍對球隊充滿信心:「我仍相信球隊係有實力嘅!依家惟有落力做好自己,喺球場拚盡交出100%努力,自己踢起上嚟問心無愧,睇吓嚟緊會唔會有機會衝擊到其中一個盃賽錦標。」