總結:8+24!聯盟教父高比球衣退役

20171219
東網電視
更多新聞短片
高比拜仁重返湖人主場。(互聯網圖片)

NBA巨星高比拜仁退役1年半後,湖人破天荒將佢嘅8號同24號球衣同時退役。「聯盟教父」高比坐直升機重返湖人主場,除咗大批名宿畀面到賀,網上仲出現留言致敬熱潮,最後湖人喺加時後以114:116僅負衞冕總冠軍勇士,輸波都算打出「曼巴精神」。

39歲嘅高比坐私人直升機到場,手推BB車,帶埋老婆同3個囡囡出現,到退役儀式開始後,高比更忍唔住攬住老婆跳舞,而且佢唔止用英語、意大利語同西班牙語3種語言回答記者問題,仲自爆依然每日5點起身練習,然後帶囡囡返學。

當被問到8號同24號當中,邊個冧巴最代表到自己,高比咁答:「如果只能揀1個,我揀24號,唔係因為24號更成熟,係因為24號更硬淨,經歷過好多掙扎同考驗,特別係我職業生涯後半段,受到傷患影響真係好難捱。」

另外,高比自爆退役戰對爵士瘋狂攻入60分,全靠老婆鼓勵:「我要感謝大家,但你哋唔知道,我打最後1場比賽嘅時候已經好攰,但雲妮莎話要送禮物畀我,件波衫上面有好多簽名同鼓勵字句,包括有魔術手、米高佐敦同標羅素,我知道要堅持落去。」

其實高比話8號同24號嘅精神冇分別,只係代表唔同類型嘅猛獸,不過佢嘅勇於挑戰嘅「曼巴精神」,就感染到好多後輩,例如艾榮、保羅佐治同湯馬士,都當正高比係人生導師,所以有傳媒話,高比嘅地位已經升華到「聯盟教父」層次。

事實上,唔止大批殿堂級球星畀面撐場,現時聯盟最頂級球星包括勒邦占士、史堤芬居里同杜蘭特,都有喺社交網站留言致敬,最後高比鼓勵年青人要追尋夢想,並且用退役時嘅名句結束發言:「多謝大家,我愛大家,Mamba Out!」

比賽方面,雖然史堤芬居里、積蒙格連同柏祖利亞3個正選因傷缺陣,但勇士冇放棄爭取9連勝,當中杜蘭特有36分、11個籃板同8次助攻,奇利湯臣有17分、10個籃板同2次助攻,就算波爾有16分、6個籃板同6次助攻,都阻唔到湖人3連敗。

同日,火箭喺主場以120:99擊敗爵士,占士夏登取得26分、6個籃板同6次助攻,延續今季出色表現,而且基斯保羅獲選為上周西岸最佳球員,個人職業生涯第13次獲選後,取得18分、9個籃板同10次助攻嘅準3雙數據,帶領火箭升空14連勝。

最新賽果(左方主場)

黃蜂 109:91 紐約人
溜馬 111:112 塞爾特人
鷹隊 110:104 熱火
公牛 117:115 76人
火箭 120:99 爵士
木狼 108:107 拓荒者
雷霆 95:94 金塊
小牛 91:97 太陽
馬刺 109:91 快艇
湖人 114:116 勇士

東網體育同你追實體壇每個精彩時刻!
http://bit.ly/2ecTF2A