【港超專版】大食宅男方栢倫:我愛住家飯!

20171220
東網電視
更多新聞短片

由「學界小志強」時代開始,香港飛馬左閘方栢倫已培養出「大食」習慣,誇張得出現「人哋食兩隻雞翼,但我要食兩磅雞翼」的場面。現時被隊友封為「擦得之人」,與其餐餐在外叫「加底」,「栢倫」選擇「愛回家」,由媽媽擔當私人廚師,「度身訂造」豐富餐單,愛心住家飯令他能量值爆晒燈! 

圖/文:袁志浩

未有Facebook及Instagram等社交網站帳號,操練後又鮮有與隊友共膳,方栢倫在外界眼中可能屬於「宅男」,不過「別人笑佢太瘋癲,佢笑他人看不穿」,宅有宅的好處,皆因有媽媽的愛心住家飯為他補充力量:「食對我人生好緊要,做運動員要吸收足夠蛋白質同能量外,我亦比較為食,出街食飯都要叫多飯,所以喺屋企食會好啲,因為阿媽會整多啲飯餸畀我。食住家飯仲有兩個好處,一來唔使諗食乜,二來健康好多,油、鹽、糖一定少過食肆,所以除咗返學之外,我日日操練完都會返屋企食飯。」

香港飛馬左閘為踢波忍口

「栢倫」自小已培養出「大食」習慣,誇張得一個人吃4、5人分量,他笑言「人哋食兩隻雞翼,但我要食兩磅雞翼」,所以當時比同齡小朋友「大舊」,憑強勁腳頭被冠以「學界小志強」稱號。不過現時作為職業足球員,有時亦要忍忍口:「我最鍾意食咖喱薯仔雞,可能因為多澱粉質,細個發育比人快。但依家大個要學識控制飲食,唔好畀自己肥,影響踢波表現,可能媽媽一星期得一兩餐先會煮得好豐富、食得特別多,其他日子都係正常。」

訪問當日枱上一碟碟好餸,早已切好的紫菜飯卷、自家製餃子,甚至滑雞煲仔飯都有,當然亦少不得健康的生果,每一樣都是方媽媽精心炮製:「我會擔心出面嘅食物質素,所以會問定佢係咪返屋企食飯,一早就去預備食物,多數會煮有營養餸菜,每日都唔同款式。一般都會燉定盅湯畀佢,每星期又煲唔同湯水,每日都準備3個鐘以上,真係花好多心思。」

雙線發展媽咪倍安慰

屋內放滿「栢倫」小時候贏得的各個獎項,自小家人的支持對他尤其重要,「栢倫」亦坦言將家人放於首位,現時於理工大學修讀中文及雙語學系,除了為未來日子提供保障外,背後原因更是希望完成媽媽心願。兒子生性,方媽媽亦倍感安慰:「依家好開心,見到佢足球上有少少成就,又兼顧到讀書,呢個係我一直期望,佢好知道我心意,一路都兩邊做,唔想令我失望。除煮餸之外,佢有比賽我一定會到場,風雨不改邊度都會去,畀佢知道無論贏定輸,我都會喺背後支持佢,陪住佢成長。」


想再外闖最怕「球場放題」

今輪港超專版以「放題」作主題,司職左後衞的「栢倫」聽到這兩個字後即時「買佢怕」,皆因原來「放題」有另一種含意:「『放題』喺球場上形容畀人任過,啲人會講笑話好似八達通、身份證都唔使就過到你,球場上當然唔想聽到,會好打擊自信,不過暫時呢半季都好彩冇畀人放題,希望延續到全季都有好表現。」

感謝楊正光提點

初出道時擔任進攻球員,因此「栢倫」現時亦封馬些路及華倫西亞等攻擊型翼衞為偶像,今季助攻次數大增,他指要感謝教練及隊友:「上季狀態好差,會質疑自己,多謝今季楊正光教練不斷提我企位,叫我放膽去Overlap;同前面嘅陳肇麒默契亦愈來愈好,所以建立起信心,其他隊友又會互相補位,令防守表現提升。」

過往「栢倫」曾外闖中甲,不過最後結果並不如意,再有機會的話,他亦希望讓自己試多次:「我依家讀緊Year 3,完成學業之後,想趁年輕外闖多一次,睇吓自己可以行到幾遠。今次比當年更成熟,目標係東南亞、中國或者北美,但我企位仲未做得好,出去對波Timing亦未掌握好,我知道自己要再進步先至有機會。」