【港超專版】李溢晉:唔想再衰畀人睇!

20180201
東網電視
更多新聞短片
李溢晉:唔想再衰畀人睇!

改過自新,能令人變得更強。冠忠南區守門員李溢晉(Edward)去季因未能通過藥檢而停賽,這位22歲門將剖白事件真相,不甘一世背起「藥檢肥佬」的標籤,把握只此一次的機會重新開始,9個月內積極狂操,由冇班落到復出首場即當選直播賽事MOM,誓要用表現做年輕人最佳榜樣!

圖/文:袁志浩

上月冠忠南區作客傑志,一場如常的港超聯賽事,卻對曾因未能通過藥檢被罰停賽的南區門將李溢晉意義重大。苦等9個月機會終再降臨,22歲的他表示今次「唔衰得」:「呢場波唔可以有任何失誤,唔係就會畀人話呢個人都無用嘅,又藥檢肥佬又踢唔到波,加上隊友都同我講呢場係翻身戰,成個星期腦海都幻想比賽情況,唔想再衰畀人睇。」

賽前過澳門飲嘢累事

故事由去季對南華一仗說起,Edward賽後藥檢不及格,初時被罰停賽兩年,成為香港足球史上首宗禁藥事件,震撼球壇。「當時好愕然,我差唔多每日練完波就返屋企,諗番最有機會就係比賽前同朋友過澳門睇演唱會,為咗應酬朋友嘅老闆,飲咗杯不明飲品。之後都覺得唔舒服,曾經考慮休息唔做後備,但始終對手係南華,都想幫到隊波。賽後藥檢我好快搞掂,當時唔覺得有咩特別,冇諗過最後肥佬。」Edward回想道。

在香港這個現實型社會,停賽兩年經濟確實難以負擔,Edward曾有放棄足球的念頭,堅持只因不甘心:「當時只係啱啱踢起,身邊好多人支持我,覺得我有潛質,唔想辜負佢哋期望,亦唔想就咁退出,好多嘢係捱番嚟,如果一下子冇晒好唔值得。期間聽過冷言冷語,只好當係動力,你愈睇死我,我就愈要表現畀你睇,要掩住你把口,令你改觀。」

力證「唔要我係你損失」

後來因上訴成功獲減刑至9個月,加上停賽期正值休季,Edward坦言重拾希望。不過早已揹起「藥檢」標籤,要覓得球會落班亦非易事,他惟有一直狂操保持身形,終皇天不負有心人:「就算只聽到有機會落班,都增添唔少動力,一直保持正面態度,同自己講唔可以低過之前嘅水平。最後去返南區好開心,想表現到畀其他人睇,你唔要我係你嘅損失。雖然知道重拾狀態好難,幸好自己感覺仲喺度。」最終Edward復出首戰屢救險球,助球隊守住和局,更當選該仗Man Of The Match,證明自己有力與同輩袁皓俊及陳嘉豪等睇齊,未來力爭港隊席位:「希望做個全面嘅守門員,成為好龍門一份子,港隊冇理由只係得幾個人揀,有邊個唔想做第一。」

「停賽喪操檢討態度」

改過自新,能令人變得更強,亦令Edward更認真看待球員身份:「球員要識得分輕重,以前我態度有問題,覺得唔使踢就唔關我事,如果當初有依家嘅態度,可能已經飛黃騰達。每個人都有機會犯錯,我依家仲有一線生機重新開始,係好幸運嘅事,所以我會更加珍惜,做年輕人榜樣,有機會改過就一定要好好把握。」


感激冠忠南區兄弟求情

Edward被停賽前正效力冠忠南區,隊友謝德謙、梁子駿及陸志豪等當時亦有為Edward撰寫求情信,更多次「落嘴頭」說服球會再次給予加盟機會,Edward對此十分感動:「好感激每個令我可以繼續踢波嘅人,尤其是Ricky(主教練鄭兆聰),同埋一班隊友,佢哋真係無條件咁支持我,我覺得好難得,球會氣氛好好,大家好似屋企人咁融洽。」

跟前守門員教練學到嘢

南區幾位門將與前守門員教練保查特別老友,保查早前離隊時Edward更於社交網站撰文感謝對方,原來當初Edward由東方龍獅外借南區,亦因為這位西班牙籍教練:「當時想吸收外國教練嘅訓練方法,睇吓有冇新進展。保查嘅方法好全面,要我不停諗不停練,比賽時會更易集中,每課都會想知有咩練,渴望感更高。依家覺得自己腳下功夫有改善,意識同企位都學咗好多嘢。」為報答球會,Edward希望可於今季協助球隊奪得足總盃,贏得參加亞洲賽的資格,並於下半季聯賽力爭更高名次。