【港超專版】黃駿軒否認堅茅：話我陰濕OK

「我唔接受我係一個踢茅波嘅球員」港超聯《大平反》第三輯輪到理文球員黃駿軒登場。5年職業球員生涯中，司職中場的黃駿軒，一向以硬朗、「唔驚死」見稱，更多次「做低」對手，包括去年3月一次衝門，差點令靚仔門將謝德謙破相，因而被圈中好友取笑為「茅軒」。「搞錯？笑我陰濕都OK，但話我茅就接受唔到囉！」文：戴陶蔚

由於身材「細細粒」，故自幼視踢足球為唯一興趣的「軒仔」，自加入東方青年軍開始，除了努力提升個人技術、改善足球意識外，還花了不少心思去學習「保護自己」。「我好鍾意玩波，扭過人帶畀我好大滿足感，所以我選擇喺進攻中場呢個位置上發展，但就算我幾好波、幾扭得都好啦！因為我比較細粒，好容易畀人一拍埋嚟就散，所以我除咗練大隻啲，仲要學識點去保護自己。」「茅軒」背後，「軒仔」道出自己踢法之由來。

有口角之爭都唔會傷害人

屬於東方青訓產品的「軒仔」，自東方5年前重返頂級聯賽開始，便離開恩師「和哥」李健和出外闖天下，先後效力晨曦、黃大仙、理文流浪和理文，多年來不乏前人過料，如何在場上保護自己。「好難講畀你聽點樣保護自己，總之電光火石之間，我都係會揀保護自己先，畀我揀我會認自己陰濕，但唔接受我係一個踢茅波嘅球員！」口講如此，但印象中「茅軒」在場上先被球證吹罰，繼而與「受害人」口角的鏡頭並不鮮見。「大家都係靠對腳搵食，我唔會特登去傷害人囉，信唔信都好，我唔會專登去茅人、傷害人。」面露不悅的「軒仔」強調。

受害人謝德謙：肯定佢無心

被指茅的人堅稱自己不茅，那麼就傳「受害人」謝德謙作供：「落到場各為其主，有損傷難免，無錯嗰次係就係傷得大鑊啲，但我好肯定『軒仔』唔係特登傷我，我好記得嗰吓係『六四波』我六佢四，但佢好勇咁照衝門，想博我甩手啩，但差唔多相撞嗰陣，原本腳底行先嘅佢，因為唔想對我使出穿心腿所以縮腳，但因為縮咗腳反而個膝頭隊咗埋嚟。結果咪大家見到咁囉，之後我知佢好驚，佢亦有搵我道歉，我睇埋重溫，好肯定佢係無心，係意外嚟，我當然無怪佢啦！」該名效力冠忠南區的門將，更稱讚「軒仔」場上很有火，是充滿鬥志的好球員。

得悉「受害人」為自己申冤，「軒仔」即回復「寸嘴」本色：「都話啦！你問邊個答案都一樣，大家踢波最清楚，梗會有人堅茅，但唔係我！我唔會因為驚人話我茅改變踢法，總之我唔茅，唔好再嗌我『茅軒』啦！」