英超雙雄齊輸唔同命　祖記食刺入8強

即上英超刨績王：http://win.on.cc/epl

祖雲達斯周三歐聯16強次回合，到英格蘭足球聖地溫布萊球場造訪熱刺。雖然主隊有孫興民入波一度取得優勢，但係老婦人下半場有希古恩同保羅戴巴拿，3分鐘入兩球，客隊終以2:1反勝，總比數贏4:3殺入8強！

哈利卡尼開賽15分鐘差啲就KO祖記，佢過埋保方之後起腳射門，可惜修正唔切，個波只係中網側。熱刺入唔到波，維頓漢差少少累死隊波，出腳踢跌杜格拉斯哥斯達，好在球證「幫手」話冇事。不過，睇番慢鏡，維頓漢出腳確係中人唔中波，走得甩真係好運。

縱觀半場，熱刺控制住戰局，祖記雖有攻勢，但係一啲都唔入肉，而且博唔到12碼，運氣都欠奉。熱刺控制住戰局，多次埋門無果，終於喺41分鐘由孫興民接應捷比亞橫傳得手，為球隊先開紀錄。

老婦人換邊後積極追番粒，數次大難不死唔使輸多粒之後，畀希古恩於64分鐘接應基迪拉二傳，近門快洛里斯一腳射入，追成1:1平手。祖記追平即時生猛晒，戴巴拿喺3分鐘後接應希古恩妙傳，同主隊門神單對單，左腳靚射破網，祖雲達斯反超前之餘，仲喺總比數領先！

熱刺傾力反撲，完場前仲有哈利仔頂中柱，可惜都係搞唔掂祖記條血肉長城，最終輸1:2，總比數以3:4出局。另一支英超球隊曼城，首回合大勝巴素利4:0，次回合返到主場，有加比爾捷西斯、利萊桑尼等人組成強陣，但係就大踢風流波，同熱刺一樣輸1:2，但係仍然無阻佢哋晉級。

Go Go 開波 GOAL DX 策略手遊

贏盡100萬現金獎賞 https://goo.gl/irtKhK

東網體育FB同你追實體壇每個精彩時刻！