港超聯　兩軍賽後齊插球證　達Sir：好可悲

港超聯周日（11日）假元朗大球場上演的「地區打吡」，主隊陽光元朗於補時階段在門將陳嘉豪被杜度力壓之下，遭艾華度為和富大埔追成2比2完場。今場賽事火藥味甚濃，一眾元朗球員遭追和後，不滿判決而向球證投訴，最終賽事在沒有重新開賽下終結。

賽後陽光元朗主教練曾昭達，對球證鄧慶富的判決表示失望：「唔係用可惜嚟形容，我覺得係可悲。我相信如果香港要進步好難囉。我相信佢係鍾意足球嘅，但係我希望佢明白咩係足球。我尊重裁判嘅，但係判決上面如果大家都唔進步嘅話，好難令到成個港超聯進步。呢啲咁嘅判決會浪費咗好多有心搞波、踢波嘅人。球員點努力、畀幾多資源，原來喺啲細微位都冇進步過。」

「達Sir」續指：「如果今日場波係甲乙丙組，我相信已經打咗架喇。」至於會否上訴，「達Sir」指會同球會商量。此外，達sir大讚球員努力：「我哋受到法比奧停賽影響，但係我好欣賞一班球員落到球場咁努力，即使兩黃一紅，都盡力搏贏波，贏唔到係美中不足。」

和富大埔主教練李志堅賽後則指，球隊今仗希望取勝，惟在一眾球員推前進攻時卻暴露了空位予艾華頓憑反擊取得入球。「堅Sir」亦指出，球證能夠在比賽期間可以處理得更好，並指他有些情況處理得不夠決斷，無法令比賽暢順地進行，而在賽事中有球員認為判決不公道而作出報復問題，球證未能避免令事件升溫及控制場面，已是問題所在。