【港超專版】甘苦與共!林浩鈞勁過謝拉特

20180315
東網電視
更多新聞短片
曾效力英超利物浦多年的鐵血隊長謝拉特,球員生涯尾聲轉投美職洛杉磯銀河,可見現今球壇要做到「一生一球會」很難,更難的是無論球隊在丙組、升甲組、降班、再闖港超也能夠甘苦與共,經歷15個球季仍忠心耿耿於南區足球隊,林浩鈞「忠心之冠」恰如球隊名稱冠忠南區!這位「冠忠」於南區的30歲前隊長,今屆雖因陣中球星如雲未獲上陣機會,但仍默默耕耘,從沒有轉投其他球隊的念頭!圖/文:司徒子文
傑斯、托迪、馬甸尼都是世界球壇難得的「忠心」分子,本地波也有位林浩鈞,由15歲投考青年軍加盟仍是丙組的南區,到現時30歲經歷了升班、降班再衝港超聯……這15個寒暑讓這位「老兵(老資格)」回味無窮:「我自細住喺南區,讀書都喺呢度,當年15歲撞正有區隊招募,我就同啲同學抱住去玩嘅心態試腳,點知投考成功,一踢就踢咗呢支球隊15年!最初隊波都係業餘踢丙組,即使我中學畢業後都繼續『柴娃娃』咁踢,雖然一邊揸貨車、一邊兼顧練波,但『兄弟班』卻能夠喺2011年贏到初級組銀牌冠軍,真係畢生難忘……尤其以隊長身份喺大球場捧盃,我都好想喺有生之年再試多一次!」
一踢15年柴娃娃變專業
問到在這15年內,可曾想過離開南區,「鈞仔」坦承曾有此念頭:「加盟球隊第10年,球隊仍喺乙、丙組浮沉,但我已經25歲,雖然仲好鍾意踢波,但要同時兼顧正職揸貨車工作真係好難,有諗過『算把喇』直接退出就算!好彩嗰年爭到升甲組資格(即現為港超等級),喺『大頭文(教練馮凱文)』帶領下踢出『蔗渣價錢燒鵝味道』,連續兩屆拎到聯賽第4,亦得到新衝擊同埋成功感,所以又繼續踢落去!」
去到2014年,球隊不參戰新成立的港超聯,換句說話即要降到甲組重新起步,但只經過短短一季,南區又再憑實力回歸頂級聯賽!這次搭「升降機」更堅定了「鈞仔」留隊的志向:「雖然要落番甲組,但反而令球隊有更多時間為未來計劃籌備,當中得到冠忠巴士贊助後,更定下長遠目標!呢次重返頂級聯賽,球隊變得好專業,我亦做到職業球員,即使差唔多30歲先夢想成真,但見證到呢隊波同自己由青年軍、柴娃娃、兄弟班再走向專業……相信呢個經歷唔係人人都可以有!」
「無顧慮踢波 後備又如何?」
不過,正是球隊日益壯大,有實力球員不斷加盟,令到昔日的隊長、升班功臣也變成長居後備,然而「鈞仔」卻毫無怨言:「我好鍾意踢波,由15歲參加業餘嘅南區開始,一直都因為工作生活,唔可以全情投入去踢波!但依家我可以日日有波練,仲無後顧之憂去踢足球,我仲可以有咩唔滿意呢?」林浩鈞坦言經過15年光景後,已與南區不可分,除非掛靴,否則仍會「一生一球會」!
揸校巴+足球+湊女=完美
冠忠南區一向重視球員,更推出了「球員生活及退役計劃」,現時林浩鈞就在贊助商冠忠巴士內兼職,為退休後的未來賺取經驗,亦令他大叫生活完美:「依家我朝早5點去揸兩轉校巴,9點就可以返屋企休息,11點到球場操練,下午1點後就係私人時間!呢個計劃除咗可以增加收入同賺經驗外,最緊要係我有一整個下午同夜晚去陪啱啱出世嘅囡囡,呢段珍貴時光用幾多錢都買唔到!試諗吓,呢份工可以畀我朝早盡情去踢我最鍾意嘅足球,下午又能夠盡享天倫樂,日日湊女踢波幾開心……比香港依家成日加班嘅其他工作,我可以話係完美啦!」