總結：騎士又輸！大帝同教練吵大鑊
20180316
東網電視
更多新聞短片
勒邦占士(圓圖右)同教練路爾鬧文。(互聯網圖片)
騎士喺NBA作客以105:113不敵拓荒者，勒邦占士攻入35分，而且繼續有全能數據表現，可惜騎士依然慘敗。美國傳媒仲發現，大帝喺比賽期間曾經隔住隊友同教練路爾吵大鑊，令人擔心騎士嘅士氣會進一步下沉。
經過第1節落後3分，拓荒者開始踩油，最後列拿特有24分、3個籃板同9次助攻，CJ麥哥林有29分、1個籃板同3次助攻，帶領拓荒者11連勝，就算勒邦占士有35分、14個籃板、6次助攻、2次搶截同3次封阻嘅全能表現，都改變唔到騎士近4場第3次落敗。
其實勒邦占士已經盡晒力，佢喺比賽初段，更加試過飛身喺2米11嘅盧傑頭頂單手大力鋤樽，點知最後都冇用。報道仲話，大帝不滿教練質疑佢嘅出手決定，曾經隔住2個助教同3個隊友，大聲同路爾鬧交，球迷都好擔心佢哋嘅關係會惡化。
同日，火箭喺主場以101:96擊敗快艇，雖然基斯保羅得11分、4個籃板同3次助攻，兼且同球證拗數食技術犯規，但占士夏登有24分、5個籃板同7次助攻，包括喺第4節關鍵時刻射入高難度跳射，協助火箭完成3連勝，球會史上第6次得到西南區冠軍。
最新賽果(左方主場)
溜馬 99:106 速龍
鷹隊 117:129 黃蜂
紐約人 110:118 76人
火箭 101:96 快艇
灰熊 110:111 公牛
馬刺 98:93 塘鵝
金塊 120:113 活塞
爵士 116:88 太陽
拓荒者 113:105 騎士
Follow東網體育IG一齊撐本地運動員！
東網體育FB同你追實體壇每個精彩時刻！