【最美隊長】若琪戀愛了！高材生男友矮6cm
20180321
東網電視
更多新聞短片
「中國女排最美隊長」惠若琪，甜絲絲話畀全世界聽拍緊拖！今年年初因傷宣布退役後，惠若琪依然非常活躍，日前上電視節目親自表示，同一名「醫學工作者」蜜運中；對方身高比自己矮，但高度「算合格」。雖然男友身材輸蝕，但就對惠若琪好好，除「千里送飯菜」外，仲自學心臟醫學知識，由內到外都咁愛女友。
惠若琪又靚又高打波又勁，於里約奧運就以隊長身份，帶領國家隊勇奪金牌，Fans數量勁多，雖然現時已經退役，不過人氣不減，國內球迷對佢私生活更非常好奇。惠若琪日前上電視表示，因為好多人關心佢，而同男友又發展穩定，所以就選擇公開戀情。
惠若琪話：「之前有節目主持問，我男友有多高，我說不知道。之後量了一，1米86.5，算是合格。」惠若琪身高1米92，換言之佢比男朋友高約6cm。據國內傳媒報道，惠若琪同男友楊先生，係於一次聚會上結識，開頭女方冇過電，但於楊先生狂追下，惠若琪被對方「幽默」同「博學」吸引，最終成功拍拖。楊先生係一位「醫學工作者」，對女友無微不至，周時自己煮飯，千里迢迢咁送畀女友食；另外惠若琪曾做過兩次心臟手術，楊先生雖然唔係心臟專科，但都自學心臟醫學知識，令惠若琪勁冧。
惠若琪人氣咁勁，絕對有資格做明星，但佢話冇諗過咁做：「我不想入娛樂圈，這不是我的專項，我的特長是在體育方面，用體育跨界到很多項目，不忘初心，讓體育在大家的生活中，發揮更大的作用。」
Follow東網體育IG一齊撐本地運動員！
東網體育FB同你追實體壇每個精彩時刻！