【港超專版】興趣變成職業 幸福男陳銘剛

20180324
東網電視
更多新聞短片
興趣變成職業,幸福男陳銘剛。
能夠將興趣變成職業,絕對是件幸福的事情,但實情往往是「興趣不能當飯食」,更多人為現實生活而被迫放棄追夢。凡事總有例外,曾在本地球圈「兩出兩入」的理文中場陳銘剛就是「幸運兒」,他坦言只有足球場才找到自己的天地,繼續無悔地追逐足球夢!
圖/文:何彥霆(部分相片由受訪者提供)
先後於南區及標準流浪失意,並兩度退出球圈的陳銘剛,曾與友人合資經營室內足球場,亦在銀行任職過,但最後都選擇穿上「波砵」重拾球員身份︰「其實『兩出兩入』當中有好多原因,當然個人原因同外在因素都有。出邊嘅世界我試過又睇過,但都係鍾意做同足球相關嘅嘢。當馮嘉奇同『馮Sir』(馮凱文)搵我時,我已經好快有決定,我要返嚟球場,因為我係屬於呢度!好多人同我講,出邊咁多行業畀你去發展,但好多人都話冒險,問題係人生總要冒險㗎啦!你唔去試,個個做同一樣嘢,呢個係咪我想要嘅呢?」「肥剛」又慶幸去季復出獲家人最大支持︰「佢哋話我會知自己做緊乜,當我搵到動力去做,反而戥我開心。」
不以「老大哥」自居
陳銘剛在理文陣中雖是年紀第二大的球員,僅次於隊長趙俊傑,但「肥剛」認為輩分並非學習對象的指標︰「一隊波當中大家都喺同一個層面去睇同一件事,唔好因為我年紀大啲經驗多啲,就要信我嗰套。我反而想同佢哋一齊搵個更好嘅方法,睇吓點樣令件事做得更好。當然個人經驗係會分享,譬如話我睇到啲嘢,我會用分享多過教導嘅角度帶出嚟,件事要佢哋自己分析。我覺得每個年代嘅球員都有自己唔同嘅優勢,呢班青年球員其實好有活力,亦夠膽識。」
辦足校做榜樣以身作則
已打算將來轉任足球教練工作的陳銘剛,其創辦的足球學校Konter,今季亦借用甲組球會凱景的名義出戰青年聯賽,雖然今季為理文上陣時間並不多,但「肥剛」希望能夠以身作則︰「點解要繼續踢落去呢? 因為我想自己做好榜樣,當決定行教練呢條路,就要以身作則,無論我係一個乜嘢球員都好,只要仲有機會,一定會繼續努力。」
「唔好Set限期畀自己」
問到有甚麼意見給熱愛足球的小將,「肥剛」表示:「最近有小朋友問我踢唔踢波好,我就同佢講,你揀咗踢就唔好諗!同埋有一句說話我唔係太鍾意;『我畀3年時間自己,踢得掂就OK,唔得就轉行!』咁可能第4年你踢得好呢?你畀個限期自己,就會覺得就嚟限期將至,到嗰陣一切就完,但唔應該係咁!」