沙拿入波追到杜奧巴　利物浦反勝水晶宮

即上英超刨績王：http://win.on.cc/epl

利物浦喺周六英超頭場，作客水晶宮。雖然水軍今季對Big 6成績差到嘔泡，但係今仗發揮出色，令到紅軍陷入苦戰。利記一度落後，多得沙迪奧文尼同穆罕默德沙拿嘅入球，以2:1反勝水晶宮。埃及王子沙拿仲追平車路士名將杜奧巴，喺2009至10年創出嘅非洲球員單季最多入球紀錄(29球)添！

紅軍開波雖然較積極，但係多次畀水晶宮沙夏屈機，終於喺12分鐘出事。卡列奧斯出迎解圍踢到沙夏，球證毫不猶豫判極刑，米利禾積域主射得手，主隊取得領先。利記上半場極之唔順。

利記半場攻勢唔算銳利，畀水晶宮屈機。喺鶴臣安排下，賓迪基褪後少少踢，令到兩位紅軍中堅要壓前，左翼嘅沙夏，企得仲前過賓迪基，不停喺進攻左路屈阿歷山大阿諾。輸12碼個球就係阿諾畀沙夏成功楔位而輸。阿諾上半場畀沙夏「震撼式教育」，怯場到飛起，衰到連界外球都掟唔好，畀球證吹番轉頭。

紅軍換邊後初段開始有好轉，占士米拿49分鐘左路沉底，出地波穿過兩名主隊球員大細，文尼近門射入追和1球。利記追和之後條後防線又劣化，好在賓迪基呢位舊將玩「報恩」，連續兩個大好機會都浪費咗。

客隊射手穆罕默德沙拿，只差一球就可以追平杜奧巴嘅非洲球員最多入球紀錄，但係全場畀水軍球員睇得好緊，機會寥寥可數。不過，呢位埃及國腳84分鐘，近門接應安德魯羅拔臣嘅傳中，門前冷靜地攞多一腳先抽入，追平杜奧巴紀錄之餘，亦順利幫球隊全取3分。

Go Go 開波 GOAL DX 策略手遊

贏盡100萬現金獎賞 https://goo.gl/irtKhK

東網體育FB同你追實體壇每個精彩時刻！