VAR玩轉德甲 更衣室急召門將係咩玩法
20180417
東網電視
更多新聞短片
弗賴堡球員喺更衣室外睇VAR片段。
即上英超刨績王：http://win.on.cc/epl
今季引發唔少爭議嘅VAR視像球證，今晨喺德甲下游大戰又建一「功」！話說喺今場緬恩斯主場對弗賴堡賽事，就嚟完半場時候，緬恩斯嘅保辛斯基嚟次遠射，點知畀弗賴堡守將甘普夫疑似用手擋開個波。當時球證韋卡文就認為未有犯規，隨即吹完雞完半場，兩邊球員都相繼返入更衣室。不過，呢個時候韋卡文先收到VAR球證史甸侯斯通知，個波懷疑有問題，需要主球證去睇多次片，事後韋卡文就判咗係12碼，只不過弗賴堡球員已經返晒更衣室，令到場面極為尷尬。
據知，弗賴堡主帥施特拉希曾經一度表示拒絕重返球場：「我哋唔會出返去囉！」部份球員則睇緊VAR重播，諗住睇定再決定點做？好彩最終佢哋都肯拉隊重返球場，門將舒禾路都返去大門守球12碼，雖然最後失守，但總算令場波繼續舉行。
弗賴堡臨場輸0比2完場，不過佢哋嘅體育總監沙亞就似乎唔多滿意球證判決：「我哋聽到完場雞聲，理想上場波就係完咗，依家我哋要被逼接受判決，一切都好奇怪囉！」
東網體育同你追實體壇每個精彩時刻！