俄丙聯賽大棕熊主持開球 動物組織轟唔人道

20180417
東網電視
更多新聞短片
大棕熊原來叫Tima。(網上圖片)
即上英超刨績王:http://win.on.cc/epl 
俄羅斯丙組聯賽上周六進行一場中游大戰,由麥呼克(Mashuk-KMV)主場對納茲蘭(FC Angusht),場波最吸引唔係戰情,而係開球嘉賓。
開球禮竟然由一隻大棕熊負責,佢由馴獸師帶領入場,先隨住音樂坐喺度拍手,跟住馴獸師再交個波畀佢,大棕熊企身用前肢接咗個波再交畀球證,之後佢再由拍掌,引領現場球迷一齊拍,最終作客嘅納茲蘭贏波。
有報道指,今次係世界盃嘅預演,有俄羅斯官員打算喺世界盃揭幕戰俄羅斯對沙特阿拉伯前,同樣搵大棕熊做開球禮嘉賓。
短片惹嚟好大迴響,有網民覺得好得意,仲起咗大棕熊嘅底,原來佢叫Tima,來自俄羅斯一個馬戲團,受過訓練,之前已經有演出經驗,曾經參與2008年電影《灌籃大帝》(Semi-Pro)的演出。
不過,亦有網民指罔顧球員及球證安全,美國善待動物組織PETA總監Elisa Allen猛烈批評:「除咗唔人道以及同足球冇關,用熊嚟交波畀球證係非常危險。」佢認為熊係俄羅斯嘅象徵,應該對佢哋表現出同情心同民族自豪感,唔應該受到虐待。
俄羅斯世界盃組委會亦急急回應,否認大棕熊會主持世界盃揭幕戰開球禮。
東網體育同你追實體壇每個精彩時刻! 
Follow東網體育IG一齊撐本地運動員!