港超聯 梁冠聰叉足電 繼續做「綠戰士」

20180606
東網電視
更多新聞短片
「大佬」梁冠聰(右)帶埋爸媽去旅行,十分乖仔。   (梁冠聰提供圖片)

效力和富大埔的「大佬」梁冠聰趁休季帶爸爸媽媽、未婚妻Tiffany及其家人去台北、花蓮旅行,「大佬旅行團」於上月28日出發,全程食得招積、住得舒適,玩足7日。「今次去旅行主要想同爸爸媽媽出去遊走一下,趁假期多啲陪佢哋,特別佢哋都鍾意睇自然景象同歷史文物,所以揀咗呢兩個近近哋嘅地方去。主要都係行吓街、食吓野,不過見到爸爸媽媽開心,自己都好開心,希望將來可以帶佢哋去更多地方。」

「大佬旅行團」行程當然不少得到十分放天燈,見天燈寫上萬事平安、家人安康、心想事成等願望,惟未見與三父子熱愛的足球有關,一向愛錫家人的「大佬」解釋:「因為爸爸係另一面已經寫咗希望我哋足球事業順順利利,所以自己就唔太刻意再寫,反而當下感覺希望一家人能夠開開心心、健健康康!」

「大佬」去完台灣旅行轉眼又再去旅行,周二(5日)晚跟未婚妻Tiffany與好友出發歐遊,將會去曼徹斯特、倫敦、聖托里尼島及巴黎兩星期,更會入場看英格蘭對哥斯達黎加的友賽。

對於來季去向,「大佬」表示早已心有所屬:「每季都會有球員離開、有新球員加盟,我個人認為球隊變動唔算多。我自己下年會繼續留效大埔,原因好簡單:第一當然係因為『堅sir』,第二係因為隊內氣氛、球員相處相當融合,第三當然係因為下年有亞洲資格賽啦。」

「綠戰士」今季表現不俗,得到亞協盃資格之餘,球隊主席蔡尚圻亦表示來季會再添班費,「大佬」望以好成績報答球會及球迷:「我相信來季球隊班費加碼兼有得踢亞協杯,絕對係球員一個非常大嘅動力!蔡生從來都唔會指罵或者責怪任何球員,呢一點對於我哋球員嚟講好重要,佢好信任球員,而作為球員唯一要做嘅就係以好成績報答佢同埋球迷!」