俄軍沙特冇睇頭?咁咪錯晒囉!

20180614
東網電視
更多新聞短片
即上彩報世盃專頁:http://win.on.cc/football/cup2018/ 
4年一度嘅世盃今晚拉開戰幔,由東道主俄羅斯喺A組迎戰亞洲球隊沙特阿拉伯。雖然戲碼唔算好勁,但話晒揭幕戰,又點可以錯過!「戰鬥民族」俄羅斯身為主辦國,喺鄉親面前唔衰得,誓要擊敗同組實力最弱嘅沙特,為出線打好基礎;沙特近期熱身賽對歐洲球隊唔算失禮,兩軍搶攻博出線,可望合演入球騷,中位數2.5球嘅大盤有2.15倍值博!(Now 616、618及ViuTV 99周四晚11時直播)
有球迷笑話今場係史上最弱雞嘅揭幕戰,皆因俄羅斯現時世界排名第70,而沙特阿拉伯高啲排第67,除咗畀同組嘅埃及同烏拉圭低之外,更係今屆32強中世界排名最低嗰兩隊。俄羅斯近況唔算好,之前7仗熱身賽僅得3和4負未贏過,而且場場都有失波,防線堅唔穩陣。但正所謂「黑到盡頭就會谷底反彈」,俄羅斯叫得做「戰鬥民族」,揭幕戰喺自己地頭面對同組牌面最弱嘅沙特,點都想贏波一吐烏氣,如果能盡擸3分,對出線極有幫助。俄軍以「新沙皇」迪沙高耶夫鋪橋搭路,配合近兩季先後奪得俄超金、銀靴嘅射手史莫洛夫,今場要入波唔係難事。
亞洲雄師沙特阿拉伯自2006年後再次打入世盃決賽周,呢支昔日魚腩部隊,集訓咗幾個月,係32強中時間最長一隊,可見態度幾咁認真。沙特近5仗熱身賽獲2勝3負,唔算太曳,若單計同歐洲球隊「拍跳」,近4仗雖只得1勝3負,但其中3仗有波入,包括同以1比2僅負畀勁旅意大利及德國,上仗更是球隊歷史性首度攻破「日耳曼兵團」大門,一班箭頭信心大增,而且喺呢4仗熱身賽中,有3仗開3球或以上,有力爭取喺今晚揭幕戰入波,中位數2.5球嘅大盤乃不二之選。●法達斯維
東網體育同你追實體壇每個精彩時刻!