視帝係你！洛佩特吉喊住坐正教皇馬

東網電視

洛佩特吉(左)都幾好戲。(法新社圖片)

西班牙陣前易帥搞到滿城風雨，因為下季會轉職教皇馬嘅洛佩特吉，尋日先話畀西班牙足總炒魷，失去西班牙國家隊領隊一職，但一日之後，「銀河艦隊」即刻喺大本營幫佢搞番個上任記招，氹佢開心。洛佩特吉都好識識，提到被西班牙炒魷就喊晒口，但一話教皇馬就笑番晒，成個記招交足內心戲，今年視帝應該頒獎畀你呀！

洛佩特吉喺記招眼泛淚光咁話：「尋日係我自媽媽逝世後，人生最傷心嘅日子(被炒魷)；但今日則係我人生最高興一天！」洛帥仲講到自己光明磊落，對得住天地：「我哋好肯定所有行為都係誠實同清楚。」

據知，一眾西班牙國腳考慮到大戰在即，其實都唔贊成炒洛佩特吉，而皇馬會長皮里茲都公開批評西班牙足總行為唔適當，兼且唔公平添！點都好啦，唔發生都發生咗，洛帥開始專注皇馬事務都係合理嘅，不過依家大家都係睇番世界盃先啦！

東網體育同你追實體壇每個精彩時刻！　

on.cc東網