Robbie世盃揭幕戰舉中指 隨時被捕
20180615
東網電視
更多新聞短片
四年一度嘅世界盃又嚟啦！揭幕戰由東道主俄羅斯對沙特阿拉伯，賽前開幕儀式其中一位表演嘉賓Robbie Williams，喺表演過程中突然對住鏡頭豎起中指，呢個動作透過直播令到全世界人都睇到，真係夠晒震撼！
從Robbie堅定嘅眼神中，睇得出佢一定知道自己做緊乜，絕對唔係冇意識咁做，究竟點解佢要將呢隻中指送畀全世界呢？細查之下發現，原來喺開波前佢接受訪問話好開心受到邀請做世界盃表演嘉賓，當時仲話會喺開幕儀式中留下令人難忘嘅表演，相信佢講緊嘅就係呢個動作！
難忘就係難忘，不過就擺明教壞細路，Robbie表演後即於社交網狂收負評，不少網民鬧爆佢冇道德，更有人形容佢嘅演出為世界盃史上最差，有家長亦開火：「搞咩？我同小朋友一齊睇點知就發生咗咁嘅事（舉中指一幕）！」唔止被批評變「負皮王」，有外媒更指Robbie如果被俄羅斯有關當局證明存心以中指作出侮辱的話，可能面臨被捕，或因敗壞公共道德罪而被罰款約62,000港元。
據外媒報道，喺公布開幕儀式表演嘉賓名單中發現有Robbie Williams個名嘅時候，有英國官員就透露好擔心，因為怕有「壞孩子」之稱嘅Robbie會喺儀式上做出格嘅舉動，點知真係畀呢位官員講中！
Follow東網體育IG一齊撐本地運動員！
東網體育FB同你追實體壇每個精彩時刻！