全場被噓狂嘥機 哨牙蘇：勁嬲自己！
20180616
東網電視
更多新聞短片
（法新社圖片）
即上彩報世盃專頁：http://win.on.cc/football/cup2018/
世界盃第二日頭場烏拉圭鬥埃及，賽前被睇高一線嘅烏拉圭，坐擁全球兩個最佳前鋒蘇亞雷斯同卡雲尼，全場卻射極唔入，僅靠後防完場絕殺對手全取三分。蘇亞雷斯對上兩屆世界盃都有驚人之舉，今仗亦好「突出」，三次浪費入波良機，賽後佢直指自己踢得曳，所以好嬲自己，但領隊泰巴尼斯就公開維護佢，表示就算馬納當拿同比利，都有失準時候。
卡雲尼今仗表現不俗，曾經射中柱，仲兩次畀靚波蘇亞雷斯，但哨牙蘇唔爭氣，兩次都畀對手門將救出射門。蘇亞雷斯始終入唔到波，於場上已經黑晒面口，賽後佢話：「烏拉圭已經好耐冇喺大賽首戰贏波，所以今日贏到係值得開心，但我對自己表現好唔滿意，真係好嬲自己，我絕對可以做得好啲，特別係對手守得咁好，球隊需要我去入波。」
泰巴尼斯就話：「我見過美斯、比利同馬納當拿失準，失準唔係罪。蘇亞雷斯的確冇平時踢得咁好，但佢三次入波機會，兩次都被救出，我哋反而要讚對手門將。」
東網體育同你追實體壇每個精彩時刻！