哥倫比亞的傳統 「J神」乖仔變渣男
20180619
東網電視
更多新聞短片
即上彩報世盃專頁：http://win.on.cc/football/cup2018/
哥倫比亞今晚世盃登場對日本，王牌球星占士洛迪古斯肯定感觸良多，26歲嘅佢喺4年前巴西世界盃一炮而紅，佢唔單止帶領哥倫比亞殺入8強，佢仲以6個入球拎埋世盃金靴獎，決賽周後再以天價由摩納哥轉投歐洲班霸皇家馬德里，當時得22歲嘅佢風頭一時無兩！
占士仔擁有秀麗腳法，加上一副英偉外型，好自然受到球迷追捧被封「J神」，TVB女星鄧佩儀(Gloria)當年採訪世盃，都忍唔住搵佢集郵，恨死唔少女球迷！不過少年得志往往會令人沖昏頭腦，4年間由乖仔變渣男，原本被視為乖乖「愛妻號」嘅占士仔，同國家隊隊友門將奧斯賓拿嘅妹妹Daniela青梅竹馬，20歲仔就已經結埋婚，上屆世盃前仲生咗個囡囡，當時家庭、事業都非常美滿。
嫌棄樣衰老婆 偷食巨乳Model
不過，身為排球員嘅Daniela並唔係咩Model明星，當佢陪住占士仔出席加盟皇馬典禮後，竟然被網民狂插「樣衰」、襯唔起J神；隨住占士仔人氣愈高，「嫌棄」嘅消息開始出現，緋聞亦接踵而至，傳得最勁嘅係話同俄羅斯巨乳名模Helga Lovekaty撻著，甚至有傳呢段唔見得光嘅戀情係由C朗做中間人搭路！上年「J神」突然宣布同Daniela離婚，盛傳就係因為呢次偷食事件。
推出JR10虛擬貨幣 球壇第1人
依家由皇家馬德里外借到拜仁慕尼黑嘅「J神」，上季喺德甲發展穩步上揚，「拋妻棄女」後嘅佢更加專注於搵錢，近期積極發展佢嘅「JR10」商業王國，繼推出自己嘅能量飲料後，今屆世盃前再宣布推出「JR10幣」，成為現役球員中第1個推出個人虛擬貨幣嘅球員。相比4年前世界盃，「J神」依家有名有利，但係球迷似乎更懷念上屆「J神」嗰張單純嘅臉孔。
東網體育FB同你追實體壇每個精彩時刻！