【排第尾又如何】當年蘇聯鐵幕雄師　俄羅斯新世代復興

即上彩報世盃專頁：http://win.on.cc/football/cup2018/　

俄羅斯今屆世盃以主辦國身份出戰，賽前一直被睇淡，更加是32隊決賽周隊伍中，世界排名最低的一隊(第70位)。但結果令人「大跌眼鏡」，俄羅斯喺分組賽取得2戰2勝，依家已經出線在望，只要今晚同組烏拉圭對住沙特阿拉伯能夠保住不敗，俄羅斯即可鎖定出線資格，歷史性突破分組賽，大有重現俄羅斯昔日前身蘇聯足球嘅威名！

提到俄羅斯，相信不少老一輩球迷都會知道佢哋嘅前身係蘇聯，而俄羅斯則係自蘇聯係1992年解體之後，自94年開始就以俄羅斯身份獨立作賽。俄羅斯由94年美國世盃開始至今，合共4次打入決賽周，過去3次均喺分組賽止步，而今次則有望首度至少打入16強。

不過，假如計算埋前蘇聯喺世盃成績，佢哋平均戰績則會大幅提升，事關喺蘇聯年代，過去佢哋有7次打入決賽周，尤其喺58年至82年期間5度參賽，分別取得4至7名，包括66年取得殿軍嘅最好成績，令呢個鐵幕國家嘅高效體力型足球名聲，推上高峰，令對手聞風喪膽，相當犀利。

此外，俄羅斯過去喺歐國盃最叻係08年取得季軍，但同樣返到去蘇聯及92年獨聯體年代，則試過喺60年首屆賽事稱王，並喺64、72同88年取得亞軍。至於前蘇聯年代球星好似經典射手布洛堅、兩代門神戴沙夫同「八爪魚」耶辛，都份屬國際球壇頂級，反觀依家呢代俄羅斯，迪斯尤巴同卓利舒夫都只係掹車邊上一線尾，或者要期待22歲嘅高路雲，將來可以成為佢哋球壇嘅「新沙皇」啦！

東網體育同你追實體壇每個精彩時刻！　

https://goo.gl/ewVpvE