法國天才　忍者龜麥巴比

東網電視

(Getty Images及互聯網)

法國於世界盃C組1比0擊敗秘魯，小組連贏兩場提前出線16強，對秘魯一仗為法國奠勝嘅基利安麥巴比，不單以19歲零183日成為法國史上最年輕入球球員，其實佢一早已經係公認嘅超級英雄，因為係人都知佢係忍者龜。

麥巴比係法籍非洲裔人士，喺巴黎出世，父親來自喀麥隆，亦係佢兒時教練兼經理人，母親為阿爾及利亞人，亦係一位手球運動員，因此麥巴比注定要做職業運動員，細細個就跟住父親周圍搵班落，卒之搵咗摩納哥青年軍。

麥巴比以16歲零347日在法甲上陣，打破亨利紀錄成為法國最年輕上陣球員，之後好快就取得入球，以17歲零62日成為法甲最年輕入球球員，然後佢亦不斷打破「最年輕」紀錄，奪得16至17年度法甲冠軍，今季外借到法甲豪門巴黎聖日耳門，躋身一線巨星行列。

嚟緊新球季，麥巴比將以1.8億鎊正式轉會巴黎聖日耳門，成為僅次於尼馬之後世界第2高身價球員，佢嘅成長軌跡同法國巨星亨利好相似，所以好多人叫佢做「新亨利」，不過更多球迷鍾意叫佢做忍者龜！

麥巴比真係好似忍者龜，呢個觀點係全球網民一致公認，試過有球迷扮成忍者龜衝入球場同佢相認，而佢生日更有球迷送忍者龜面具畀佢，而麥巴比本人亦好玩得，唔介意呢個稱號。

東網體育FB同你追實體壇每個精彩時刻！

Follow東網體育IG一齊撐本地運動員！

on.cc東網