【世界盃16強】完整賽程　邊場有得免費睇？

東網電視

俄羅斯世界盃分組賽全部打晒，32強有一半球隊出局，另一半出線16強進入淘汰賽階段，走線同晉級路線圖大家都睇到，一眼望落去畀人感覺係則埋一邊，左手邊或稱上線可謂死亡區域，幾支爭標熱門撞埋一齊，場場戲肉，右手邊或下線就由西班牙一支獨秀，如發揮正常，西班牙決賽見！

先講左邊8隊，烏拉圭、法國、阿根廷、巴西4隊合共贏過10次世界盃，其中烏、法、阿加埋葡萄牙更堆埋晒喺左上角，場場都係世紀大戰，左下角亦有巴西同比利時喺度，預計兩隊8強相遇亦會殺到天昏地暗。

右邊8隊就輕鬆好多，呢邊只有西班牙同英格蘭贏過世界盃，右上角西班牙條線最靚，係8強可能撞克羅地亞會有少少壓力，但都應該有贏波把握，4強至決賽都好輕鬆，捧盃有計，所以西班牙嘅奪標賠率急跌到4.75倍嘅次熱門，僅次於4.25倍嘅大熱門巴西，唔係冇道理。

至於右下角嘅英格蘭亦避開晒以往喺大賽遇過嘅剋星，佢哋最怕嗰幾隊，德國已經出局，巴西、葡萄牙、阿根廷又喺另一邊，因此英格蘭奪標賠率亦有8.5倍，係第5熱門，不過英格蘭踢淘汰賽一向都差，兩年前喺歐國盃16強就輸畀冰島，所以都冇話條線好唔好，最緊要自己爭氣。

東網體育FB同你追實體壇每個精彩時刻！

Follow東網體育IG一齊撐本地運動員！

on.cc東網