【人物】天賦高過C朗　哥利斯馬遲來的春天

即上彩報世盃專頁：http://win.on.cc/football/cup2018/　

2003年，葡萄牙U21喺土倫盃強勢奪冠，當時球隊陣中有2個天才橫溢嘅少年，一個叫C朗拿度，一個叫哥利斯馬，當時身披7號波衫嘅哥利斯馬光芒四射，被譽為「費高接班人」，得到嘅評價更勝C朗。就喺2003呢個夏天，2位天才分別加盟巴塞隆拿同曼聯，C朗之後嘅故事，已經唔使再多講，但哥利斯馬就慢慢開始為人所淡忘。

哥利斯馬喺里斯本長大，媽媽係一個吉卜賽人，論個人技術，哥利斯馬絕對唔輸畀任何頂級巨星，當時大部份球評家都認為，哥利斯馬嘅天賦比C朗更高，Trivela(外腳背)絕技更加令人拍案叫絕，佢效力國際米蘭嗰陣曾經試過單場9次用外腳背傳波，分組賽對伊朗嘅Trivela世界波更係含金量十足嘅超級金球。

不過，呢位天才翼鋒性格暴躁，而且行事比較自我，經常會同教練發生爭執，佢加盟巴塞隆拿之後，就因為同教練列卡特不和而被打入冷宮，白白浪費自己成長最急速嘅一段時間，結果出國勇闖西班牙1年即回流葡超加盟波圖，相反好友C朗拿度就喺曼聯如魚得水，慢慢走上球王之路。

性格決定命運，哥利斯馬喺葡超重上高峰後，決定再次出外闖轉投意甲國際米蘭，可惜當時教練係出名戰術、紀律嚴謹嘅莫連奴，唔鍾意受束縛嘅哥利斯馬再一次得唔到教練信任，之後就展開佢嘅浪人生涯，輾轉去過土耳其、阿聯酋、重返葡超再去土耳其，目前喺比錫達斯已踢咗3季，算係穩定落嚟。

當哥利斯馬同C朗拿度同時出道嗰陣，唔會有太多人諗到2人足球生涯會有咁大分別，好多球迷感慨哥利斯馬浪費天賦，不過「遲醒好過唔醒」，2個月之後就35歲生日嘅哥利斯馬，臨老先至喺國家隊發圍，佢甘願以「助手」身份輔助C朗拿度，兩人亦合作無間，2年前一齊歷史性贏得歐洲國家盃冠軍。

哥利斯馬同C朗稱兄道弟，C朗今屆世界盃留「羊咩鬚」，就係喺同哥利斯馬一齊焗桑拿嗰陣做嘅無聊賭約。雖然哥利斯馬已經淡出力陣容，但佢嘅神來之筆仍然令人期待，葡萄牙周六深夜大戰烏拉圭，如果C朗畀人凍結，大家必然會望向哥利斯馬，期待佢再嚟一次「天外飛仙」。

東網體育FB同你追實體壇每個精彩時刻！

http://bit.ly/2ecTF2A