【港世盃】拍住世盃球星 傑志都有專屬西裝

20180701
東網電視
更多新聞短片
傑志有個形象教練譚雅迪。
即上彩報世盃專頁:http://win.on.cc/football/cup2018/ 
世盃正進行得如火如荼,各國球星在出發時,為隆重其事,都會穿上國家隊的專屬西裝現身,帥氣逼人。但別以為這是外國球星專利,當日香港足球明星選舉,傑志球員及教練一樣有型爆西裝「上陣」,而這批訂造西裝,原來是前職業球員譚雅迪(Eddie Tam)創辦的MODE Wedding Tuxedo所設計,傑志主教練朱志光更笑言:「Eddie係我哋嘅形象教練!」
Eddie球員時代曾效力甲組的愉園預備組、麗新,其後在海蜂更與「朱Sir」做隊友。退役後選擇從事西裝設計,全因一個「神奇」經歷所啟發——因形象好而獲俠士足球隊班主丁炯壽垂青:「有一年,丁生話:『譚雅迪你幾靚仔喎,我就簽你』」2013年傑志邀請曼聯來港獻技,曾為杜德偉、袁偉豪、王浩信等著名藝人設計服飾的Eddie,機緣巧合下開始為「藍鳥」安排衣着至今,問到球員和明星服裝上有何分別,Eddie表示︰「歌手、藝人都係喺台下都係普通人,但係佢哋上到台就會發光,所以我覺得球員、運動員都可以發揮佢哋嘅魅力,咁樣成個足球圈就會靚咗好多。」
Eddie認為,着衫要慢慢「教」︰「做形象顧問就等於剪頭髮,長頭髮突然間叫你剷到好短會令人好抗拒,要逐少逐少咁剪。」過往朱志光習慣以黑色西裝示人,但2017年出席香港足球明星選舉前夕,Eddie就設計了一套「火紅戰衣」給他,起初朱Sir都大為震驚:「嘩!我結婚都冇咁誇張!」到了今年,身為「學生」的朱志光亦自動自覺用紅色︰「第一年攞最佳教練着紅色,之後我上去都係同Eddie講要番咁上下色。」
至於一向「官仔骨骨」的盧均宜經Eddie指導後,亦由討厭變喜歡:「我平時着開啲鬆身衫,但西裝要打呔就會覺得好緊,我哋又成日出汗,所以唔係好鍾意,但依家着得多咗就覺得,咁着法令形象唔同咗,發現又幾好睇喎!」
●搞靚包裝退役路更易行
Eddie年輕時在球圈打滾,退役後也希望為足球員出一分力:「球員好難抽身離開足球圈,點解我想新一代球員形象化,因為其他人喺社會開始略有所成時,我哋反而要離開最專業嗰行,重新學過一啲嘢。喺我離開球圈之後,我乜都做過,試過同一位踢過香港隊嘅朋友一齊做啲擔擔抬抬工作,我覺得係一個好唔正常嘅現象。」
因此,Eddie認為球員需要包裝,為掛靴後鋪路:「無論教練定係球員都需要有包裝,我哋以前退役冇乜出路,如果你能夠形象專業啲,當你掛咗靴,都可以喺足球圈或者入大公司做體育相關事業,有一個專業形象可以令其他人對你更有信心。」
●國家隊西裝件件有來頭
世界盃係球壇大事,32支參戰球隊多數都會做番套西裝隊服,以免喺啲官式場合失禮,所以列強着邊個牌子嘅西裝,設計靚唔靚,往往會成為一個話題。
英格蘭着嘅係御用品牌Marks&Spencer Menswear設計、相當具有英格蘭特色嘅西裝。西班牙就同Emidio Tucci合作,保守造型中流露了活潑一面。日本就用Dunhill「武士藍」西裝,雙方其實合作長達18年。佢哋嘅西裝有唔有型?好見仁見智,例如冰島嘅灰藍色外套加啡色皮鞋,就有人話正,有人批評好唔掂。
東網體育FB同你追實體壇每個精彩時刻!
Follow東網體育IG一齊撐本地運動員!