【不斷更新】天亡三獅 圓夢又要等下次
20180712
東網電視
更多新聞短片
（Getty Images）
即上彩報世盃專頁：http://win.on.cc/football/cup2018/
【04:37】
全場120分鐘打完，克羅地亞憑文迪蘇傑加時下半場入波，以2比1反勝英格蘭，歷史性首次打入世盃決賽，將會同法國爭冠軍！
【04:33】
補時有4分鐘，英格蘭加油呀！
【04:30】
118分鐘，收起埋莫迪歷，換入巴迪積，克羅地亞領先2比1，埋尾喇！
【04:27】
115分鐘，文迪蘇傑兩度抽筋，克羅地亞換入哥魯卡，諗住死守到尾！
【04:21】
109分鐘，克羅地亞入波呀！英軍解圍唔遠，文迪蘇傑比應隊友頭槌頂中，快腳射遠柱入網，領先2比1。
【04:13】
加時上半場補時2分鐘，文迪蘇傑接應比列錫左路傳中，近門快腳撞射，好彩英軍門將比克福特及時出迎擋出，幾乎輸咗。
【04:05】
99分鐘，英格蘭右路角球，史東斯近門接應頭槌攻門，但畀克軍守將禾沙積高護空門頂出，搞唔掂呀！
【04:03】
97分鐘，英格蘭都作出調動，用艾歷迪亞入替佐敦軒達臣，似係想增加中場活力。
【03:59】
加時上半場3分鐘，克羅地亞左閘史卓歷疑似拉傷大腿，焗住換入比華歷頂上。
【03:50】
全場法定時間打完，雙方打和1比1，要加時。克羅地亞已經係連續3場淘汰賽踢加時喇！
【03:47】
90分鐘，洛夫雲30碼勁射抽高，球證舉牌補時3分鐘。
【03:40】
84分鐘，比列錫趁比克福特打手槌不遠唧射，僅僅高出
【03:39】
83分鐘，文迪蘇傑禁區窄位抽射，比克福特擋到
【03:37】
80分鐘，獲加無啦啦回後幾乎送禮，喂咪咁嚇英格蘭球迷吖！
【03:28】
史東斯犯大錯，畀比列錫勁射中柱，列比錫再射畀比克福特接住，英軍唔輸夠運
【03:25】英格蘭 1:1 克羅地亞
68分鐘，比列錫跳起左腳撐入，追成1:1！
【03:20】
比列錫禁區頂狂抽，射正獲加下體被閂出，獲加即刻倒地，之後克軍大腳再斬中，獲加剛起身再頂走，跟手再跌番喺地！
【03:13】
56分鐘，連格遠射被閂出底線，角球。角球開出，之後輾轉捷比亞第一時間傳中，卡尼嚟遲一步
【03:07】
下半場開波5分鐘，克軍都係佔主動，文迪蘇傑因發脾氣領黃
【02:46】【上半場完】英格蘭 1:0 克羅地亞
上半場雙方快打快戰情可觀，英格蘭開波5分鐘就開紀錄，查比亞彎入蘇巴錫左手面網窩，三獅好快領先。克軍之後大舉反擊，頻頻於禁區頂發炮，其中列比錫多次起腳，雖然搞到史東斯、哈利馬古尼好頻能，但門將比克福特續有出色表現，幫英軍頂住。三獅企穩陣腳後，不斷利用史達寧速度進襲對手，打到後段連格曾有機會於禁區頂空晒埋門，但竟然龍都唔中，未能拉開比數。完半場前英軍一條後防線畀人一逼，馬古尼交波就犯錯幾乎畀人單刀，半場英軍領先1粒，但絕不穩陣！
【02:45】
英軍史東斯、獲加出現混亂，幾乎畀對手單刀，但最後有驚無險
【02:35】
35分鐘，連格禁區頂空晒一抽，竟然唔中龍
【02:32】
32分鐘，列比錫禁區頂狂抽過唔到比克福特
【02:30】
30分鐘，卡尼禁區內空晒起腳，但過唔到蘇巴錫，之後佢再射又中柱，呢個時候旁證先舉旗話越位
【02:20】
20分鐘，列比錫禁區頂狂抽，英軍守衞唔要命飛身解圍
【02:19】
19分鐘，比列錫於左路扣入中路起腳遠射，唔中龍
【02:14】
又係角球，又係畀馬古尼頂到，柱邊斜出，英格蘭個勢好勁！
【02:12】
12分鐘英軍角球，又係馬古尼頂到但唔中目標，之後球證都話佢推人狂先
【02:09】
克軍圍攻英格蘭，三獅縮後，一有波就掟畀史達寧哨
【02:05】英格蘭 1:0 克羅地亞
4分鐘，莫迪歷侵犯阿里，英軍禁區頂獲得罰球，捷比亞一射入網，三獅領先！
【02:00】
開波喇！英格蘭大戰克羅地亞，睇吓邊隊對法國！
世界盃另一場四強激戰，克羅地亞大戰英格蘭，陣容已出喇，雙方都用最強陣容應戰，三獅兵團領隊修夫基以不變應萬變，繼續以其心水陣容搶決賽席位，兩名帶刀侍從衞史東斯同哈利馬古尼正選落場，賽前有傷在身嘅佐敦軒達臣亦首發出場，配合迪利亞里、連格於中場作出支援，前線兩個位繼續係隊長哈利卡尼搭史達寧。後者近期惹來唔少批評聲音，唔知今仗會唔會大打爭氣波，射入今屆第一球呢？
克羅地亞方面，陣容亦係熟口熟面，中場兩大核心莫迪歷及拿傑迪錫繼續在陣，文迪蘇傑打單箭頭，但上仗入波嘅卡拉馬歷就放喺後備席。洛夫雲會統領後防線，而近兩圈於互射12碼階段中均有出色表現嘅門神蘇巴錫，亦繼續把守最後一關。
克羅地亞正選陣容
門將：23蘇巴錫
後衞：2禾沙積高、6杜馬高維達、21洛夫雲、3史卓歷
中場：18列比錫、7拿傑錫迪、10莫迪歷、11波索域、4比列錫
前鋒：17文迪蘇傑
英格蘭正選陣容
門將：1比克福特
後衞：2基爾獲加、5史東斯、6哈利馬古尼
中場：12捷比亞、20迪利亞里、8佐敦軒達臣、7連格、18艾舒利楊格
前鋒：9哈利卡尼、10史達寧
東網體育FB同你追實體壇每個精彩時刻！