7.15最強賭局！100億法軍晒冷磨爛蓆格仔兵

東網電視

(Getty Images)

今屆世界盃2支決賽球隊終於誕生，法國對克羅地亞，兩隊可以話係貴族與平民嘅對壘。雙方無論大賽成績、晉級過程、球員身價都有天壤之別。

法國曾經2次主辦世界盃，並於1998年奪冠，今屆23人球員總身價達到11億歐元(約100億港元)，係今屆最貴球隊，進入淘汰賽後更加盡顯身價，16強、8強、4強都係法定時間90分鐘內，直接擊敗對手，表現勢如破竹，有錢又有面。

首次打入決賽嘅克羅地亞，球員總身價只有3.9億歐元(約36億港元)，唔夠法國3位球星基利安麥巴比、保羅普巴、基沙文身價總和。

「格仔兵團」晉級過程亦非常艱辛，3場淘汰賽都踢足120分鐘，其中2場仲要互射12碼，慢慢磨但夠韌。

兩年前歐國盃，葡萄牙踢7場只有1場可以喺法定時間90分鐘贏波，最後加時擊敗法國。今屆世界盃亦多次出現傳統勁旅大熱倒灶情況，克羅地亞能否重演葡萄牙「磨爛蓆」，磨到個冠軍出來，香港7月15日晚11點開波，踢完之後就有分曉。

東網體育FB同你追實體壇每個精彩時刻！

Follow東網體育IG一齊撐本地運動員！

on.cc東網