【決賽大迷信】法國隊靠鬍鬚佬帶來好運
20180713
東網電視
更多新聞短片
(Getty Images)
即上彩報世盃專頁：http://win.on.cc/football/cup2018/
法國隊在今屆世界盃順風順水，小組賽提早出線，雖然落入強組賽區，但一路晉級都冇乜阻滯，除咗球隊實力雄厚，最近有傳媒發現佢哋有個迷信小秘密，關鍵人物竟然係今屆6場從未上陣嘅後備球員阿爾拉米！呢位馬賽後衞留咗一大把鬍鬚，法國隊每場比賽前，主力基沙文都會摸佢啲鬍鬚，球隊就勢如破竹，話贏就贏。
英國《太陽報》報道，法國隊8強對烏拉圭及4強對比利時賽前，基沙文都會在球員通道摸吓阿爾拉米鬍鬚，佢好有心機去打理阿爾拉米嘅「二撇雞」，整到靚靚咁，跟住就落場比賽，結果兩場大戰法國隊都順利贏波。
再調查落去，原來今屆賽事基沙文每場賽前都有咁做，呢個舉動亦成為一項「儀式」，由於連場報捷，法國球員亦逐漸相信，阿爾拉米嘅鬍鬚為球隊帶來好運氣，佢係球隊殺入決賽嘅「功臣」。
講番事實，法國隊23人大軍當中，今屆只有兩位球員從未上陣，就係第3門將文路拿同後衞阿爾拉米，32歲嘅阿爾拉米並非常規國腳，佢參加過2012及2016兩屆歐國盃，但就缺席2014世界盃，睇番舊照片佢一向好多鬚根，但之前剃得好乾淨冇留鬍鬚，至今屆世界盃先至留大把鬍鬚，由基沙文悉心打理。
仲有一件事值得講講，就係阿爾拉米去年與加拿大影星、51歲嘅彭美拉安德遜(Pamela Anderson)相戀，女方比佢大18年，今次都有來俄羅斯為男友打氣，呢段「母子戀」似乎係阿爾拉米好運氣嘅來源喎。
東網體育FB同你追實體壇每個精彩時刻！
Follow東網體育IG一齊撐本地運動員！