【金球激鬥】邪！世盃金球難攞年終獎

即上彩報世盃專頁：http://win.on.cc/football/cup2018/

4年1度嘅世盃，可以話係全球最重要嘅足球賽事，能夠贏得世盃冠軍，甚至被選為世盃金球獎，都足以證明得獎球員嘅能力同貢獻。

不過，翻查歷史，自從1982年世盃金球獎得主意大利射手羅斯之後，就再冇呢個獎項得獎人，能夠喺同年包辦由著名足球雜誌《法國足球》主辦嘅年度金球獎選舉。考慮到《法國足球》金球獎自07年開始就由美斯或C朗拿度輪流包攬之下，而二人喺今年世盃又早早出局，似乎今屆「金球孖寶」，又會再一次由唔同球員分享。

當然，《法國足球》嘅金球獎由1956年創辦到1994年間，只係會挑選歐洲球員得獎，故當時又被稱為歐洲足球先生，要世盃金球得獎贏埋呢個年終獎，的確未必人人有資格。不過，到1995年至2006年期間，年終金球已經開放畀所有喺歐洲搵食嘅球員，直到2007年起至今更則變身成開放全球球員候選，變相成為咗世界足球先生選舉，所以話近年呢個「金球孖寶」開唔出，已經同球員身份再冇關係。

睇番近年得獎者，82年羅斯當年包攬世盃金球獎、年度金球獎同世盃金靴獎，但之後就再冇可以包辦「金球孖寶」嘅球員。強如阿根廷傳奇球王馬納當拿86年獲選世盃金球，但年度金球獎就不敵蘇聯名將貝倫諾夫。法國球王施丹喺98年贏得世盃冠軍，仲當選年度金球獎得主，但喺世盃金球獎就輸咗畀巴西傳奇射手「大哨」朗拿度。就連年度金球獎常客美斯，喺2014世盃獲得世盃金球獎，但當年亦撞正年度金球獎不敵宿敵C朗拿度，都咪話唔邪門呀！

近年雙料金球得獎者

年份 世盃金球 年度金球

2014 美斯/阿根廷 C朗拿度/皇馬

2010 科蘭/烏拉圭 美斯/巴塞隆拿

2006 施丹/法國 簡拿華路/皇馬

2002 簡尼/德國 朗拿度/皇馬

1998 朗拿度/巴西 施丹/祖雲達斯

1994 羅馬里奧/巴西 史岱哲哥夫/巴塞隆拿

1990 史基拉斯/意大利 馬圖斯/國際米蘭

1986 馬納當拿/阿根廷 貝倫諾夫/基輪戴拿模

1982 羅斯/意大利 羅斯/祖雲達斯

Follow東網體育IG一齊撐本地運動員！

http://bit.ly/2EYxoRh

東網體育FB同你追實體壇每個精彩時刻！