港超聯 元朗新兵有卡立 仲有陳柏衡!

20180715
東網電視
更多新聞短片
元朗經理郭靜然(右)向在場人士介紹幾位球員。  (何彥霆攝)

港超球隊元朗周日(15日)上午舉行親子足球活動,「橙衫軍」新一季的部分球員亦有出席,除了留效的法比奧、杜馬思及葉子俊外,其餘亮相的新球員則包括葉嘉宇、謝偉俊、陳柏衡及將於季中領取特區護照轉為本地球員身分的卡立,至於新加盟的巴西外援,則為曾效力日職球會金澤薩維根及櫪木SC的25歲巴西前鋒慕沙(Jean Moser),以及31歲巴西中場基爾頓(Cleiton Velasques)。

將會於亞運後才正式出任主教練郭嘉諾透露,球隊目前由葉子俊及法比奧負責主持球隊操練,而目前會專注亞運的備戰工作,並指希望今季執教元朗,能夠培育出更多的年青球員︰「初步研究球員名單嘅時候,都有7成係U-23球員。其實個理念都係以年青球員為主,幫佢哋成為職業足球員。遲啲會再有幾位年青球員加入,會係一啲之前未踢過超聯嘅球員,但我覺得佢哋有能力,佢哋依家都番緊工,佢哋都好想把握今次機會,其中兩人會番埋今個月就辭工,嚟緊我會去幫佢哋實現職業球員嘅夢想。當初同意喺亞運後接任元朗教練,個目標都係以培養年青球員為主,而成績都唔會講住。」

對於邀請早前涉及「假波案」而最終獲判無罪的陳柏衡加盟球隊,「郭Sir」表示希望可以給予他機會證明自己︰「係我自己主動搵陳柏衡,其實佢真係冇球會搵佢,我想畀個機會佢。其實當年我喺飛馬,覺得佢其實係有能力,但係可能係紀律同自我控制能力唔太好。件事依家都告一段落,我都想幫佢行番條好啲嘅路,畀個機會佢證明自己。」

元朗會長王威信表示,球隊組軍已接近完成,仍有球員仍在斟介中,陣中有5至6名借用球員,當中包括有望於日內落實續借的門將陳嘉豪。至於今季班費方面,王威信亦坦言會跟上季會有一定距離,而球隊冠名及球衣胸口贊助仍有待落實,對於來季展望,他亦期望球隊能夠在菁英盃有所佳績︰「雖然外間有好多說法都覺得我哋係護級份子,但我對一班新球員都有啲期望,同埋我哋都喺新外援上花咗好多心機去搵。我諗聯賽方面都係以中游為目標,但係其中最大嘅目標係喺菁英盃攞到好成績,希望可以創造到奇跡,因為我哋今年都係着重培訓年青球員,球隊裏面超過3分2都係U23球員。」