【騙中傳奇】阿仙奴簽大陸贊助商瀨晒嘢

世界各大球會都想打開龐大中國市場，不過「人仔」絕對唔易搵，好似英超勁旅阿仙奴最新就跌入一單「騙中傳奇」！「兵工廠」今年4月宣布同大陸電動車公司比亞迪簽署贊助合約，點知比亞迪最近突然發出聲明，話同阿仙奴簽約嘅負責人係「假高層」，根本唔係比亞迪嘅員工，即係話呢單鋪天蓋地嘅宣傳係流嘅，不過大批專家同網民分析，比亞迪今次係想「走數」居多！

阿仙奴同比亞迪喺4月宣布合作，宣傳可以話非常龐大，「兵工廠」仲派出哥斯尼、格列沙加同梅斯達菲3位球星，拎住印上比亞迪簡寫「BYD」嘅波衫影相，阿仙奴仲發聲明話呢次合作，係因為2017年中國之旅去上海同北京嘅成果，比亞迪仲可以喺酋長球場嘅周圍，包括座位同場邊LED廣告板落廣告。勢估唔到，比亞迪日前突然發聲明，話負責同阿仙奴簽約嘅「女高層」李娟，冒用比亞迪高管身份，用偽造印章同其他公司簽約，比亞迪全部唔知情亦同公司無關，比亞迪已就事件報案。

不過事件似乎唔係單純「冒充高層」咁簡單，唔少業內人士都指疑點重重，尤其係呢單全球報道嘅大型合作，點解比亞迪會喺3個月之後先至發現？比亞迪官方微博當時亦刊登同阿仙奴合作嘅海報(事後已刪除)，而且有相片影到當時同阿仙奴簽約，比亞迪總部品牌公關部部長李巍都有份！

對於呢次事件，投資者學會主席譚紹興形容事件「搞笑」，指上市公司都會有內部團隊或聘請公關公司每日監察公司新聞，涉及矚目嘅合作消息，公司冇可能會唔知道，加上比亞迪向來被認為係優質民企，事件反映出該公司運作有問題，管理架構相當鬆散。

有網民話比亞迪今次突然「割蓆」，其實係嫌資告費用太高想「走數」喎，亦有網民抵死表示：「阿仙奴又瀨晒，最衰都係雲格！」

東網體育FB同你追實體壇每個精彩時刻！

http://bit.ly/2ecTF2A