【意甲那些年】90年代七雄並起　粒粒傳奇

意甲喺90年代經歷最輝煌時期，除咗「米蘭雙雄」同祖雲達斯3大班霸之外，費倫天拿、帕爾馬、羅馬同拉素都擁有超強實力，呢7隊波亦被球迷稱為「意甲7雄」。呢個年代嘅意甲唔單止招牌最響，球隊嘅「燒錢能力」亦冠絕全球，唔少破世界紀錄轉會費都係由佢哋所創，結果當然係粒粒皆星，得到「小世界盃」嘅稱號。

叫得做「小世界盃」，當然要緬懷下意甲7雄經典球星啦！AC米蘭有「荷蘭三劍俠」古列治、雲巴士頓同列卡特最經典，之後嘅柏賓、波班、沙維斯域、韋亞、李安納度同迪西里都係頂尖巨星，加上巴里斯、馬甸尼、哥斯達古達、阿柏天尼、彭路基等意大利國腳，「紅黑兵團」自然最受球迷歡迎。

另一支米蘭勁旅國際米蘭同樣財氣十足，「德國鐵三角」馬圖斯、奇連士文同布林美同「荷蘭三劍俠」抗衡，另外佐卡夫、蘇沙、森莫蘭奴、辛尼迪、柏金、雲達等都實力強勁，意大利國腳就有柏魯加、柏高美、柏堤等等。

至於祖雲達斯出產不少意大利巨星，首推必數「金童系列」巴治奧同迪比亞路，加上維埃里、拉雲拿利、卡沙拉基、干迪、迪肯尼奧、迪李維奧、費拉拿、佩雷斯同恩沙基等名將，再現合迪甘斯、高拿、慕拿、保羅蘇沙、戴維斯同施丹等優質外援，實力強橫。

其他4隊同樣招攬全球猛人，費倫天拿有巴迪斯圖達、雷哥斯達、托度、白賴仁勞特立同艾芬保等；羅馬亦有托迪、禾拉、希士拿、艾迪亞、卡富同巴布等；帕爾馬就有華朗、蘇拿、簡拿華路、保方、艾斯派拿、基斯普、基艾沙、文諾迪、杜林同史岱捷哥夫等，華朗同基斯普之後都過檔拉素，呢支羅馬市勁旅仲有薛洛尼、尼維特、尼斯達同波錫等等巨星添。

呢批超級巨星一齊喺意甲爭逐，絕對係球壇其中一個最輝煌時代，依家意甲百廢待舉，難免令人唏噓，希望C朗可以成為意甲復興嘅標誌。

東網體育FB同你追實體壇每個精彩時刻！

http://bit.ly/2ecTF2A