【東洋怪男】好波多諗頭！中田29歲掛靴賣酒

本田圭佑喺澳職踢波，兼任柬埔寨國家隊領隊，真係估佢唔到。日本好波之人似乎特別難以捉摸，好似2006年，當時只係29歲嘅日本「國寶級」國腳中田英壽，仲踢緊英超保頓，竟然突然宣布退休從商。

同樣係擔任中場指揮官嘅中田英壽，被譽為最似漫畫《足球小將》主角戴志偉嘅日本球員，佢效力過意甲球隊佩魯賈、羅馬、帕爾馬、博洛尼亞、費倫天拿，最威水係幫羅馬奪得2000/01年意甲冠軍，同年幫日本打入洲際國家盃決賽，僅0:1不敵法國。

2005/06年球季中田英壽被費倫天拿外借去保頓，以為會創出事業新高，估唔到卻宣布掛靴，話要讀書，同追求足球以外嘅事業，震驚球壇。

中田英壽依家主要從事高級清酒生意，一樣搞到有聲有色。