【紅軍登場】法賓奴廢柴人球變攔王
20180812
東網電視
更多新聞短片
今季利物浦喺轉會市場狂買人，貴價簽入巴西鋼門艾利臣比加，當然係利粉最期待喇，但千祈唔好睇小另一名新兵法賓奴泰華利斯。呢位從摩納哥來投嘅24歲巴西悍將攻守兼備，可以打防中同右閘，上季佢唔單止入咗7粒兼4次助攻，同時又交出場均3.4次鏟斷，非常搶得，喺安利簡恩離隊、陣中得番較為守得嘅防中佐敦軒達臣嘅情況下，獲得擅於做掃蕩嘅法賓奴加盟，對紅軍主帥高普嚟講，可謂及時雨，隨時係紅軍減低畀對手打反擊嘅救星。
查實法賓奴喺職業生涯初期冇乜人睇好佢，從富明尼斯加盟葡超弱旅里奧艾維，竟然1場都未出過，就好似人球咁係咁畀外借，包括去過皇馬B隊，好彩後來再借去摩納哥，遇到「伯樂」主帥查甸，查甸將呢位右閘改造為防中，成為摩納哥喺2017年勇奪法甲冠軍、殺入歐聯4強嘅重要棋子。因此上季摩納哥星散，多名球星好似基利安麥巴比都走人，但法賓奴為報查甸嘅知遇之恩，決定留多1季，認真有情有義。
東網體育FB同你追實體壇每個精彩時刻！
Follow東網體育IG一齊撐本地運動員！