【紅軍登場】矮腳虎沙基利亂世求存

20180812
東網電視
更多新聞短片
(互聯網)
利物浦今季季前落重本增兵,其中就包括引入瑞士攻擊好手梳頓沙基利,比起同佢差唔多時間一起加盟嘅艾利臣比加同拿比基達等幾位新兵,梳頓沙基利嘅1300萬身價真係濕濕碎,不過唔好畀張價牌呃咗,皆因現年得26歲嘅佢,球員生涯至今夠晒曲折,不過唔知大家對佢身世,又有冇認識呢?
有睇世盃嘅球迷,相信都會記得梳頓沙基利為瑞士入波之後,做出「雙頭鷹」手勢慶祝動作,仲搞到滿城風雨。呢個動作對一般球迷嚟講可能冇咩特別,不過對作為阿爾巴尼亞後裔嘅梳頓沙基利嚟講,就別具意義,皆因「雙頭鷹」係阿爾巴尼亞國旗上嘅標誌,原來梳頓沙基利細細個因為躲避戰亂,被迫離開祖國科索沃,一家人最終輾轉落難去到瑞士,可以話家族因此同前南斯拉夫有過節。
同佢曲折身世一樣,呢位年少成名嘅瑞士進攻天才,球員生涯亦都唔平坦,佢出道冇耐就獲德甲巨頭拜仁慕尼黑賞識,成為豪門一分子,不過就未能取得正選席位,跟住職業發展就急轉直下,最令人意外嘅,係佢喺2015/16賽季離開國際米蘭之後,竟然選擇加盟史篤城,不過佢憑住超強實力,不斷交出超班表現,今季有紅軍超強班底同佢做隊友,呢位瑞士「矮腳虎」隨時再有驚喜表現。