兄弟波夾擊 港足變小三
20180812
東網電視
更多新聞短片
印尼（紅衫）大炒中華台北。（美聯社圖片）
「兄弟」齊贏波，將港隊逼咗落小組第3！亞運男子足球賽周日上演第二輪比賽，伊斯蘭兄弟分途出擊，「細佬」巴勒斯坦喺早場幾經辛苦險勝老撾2比1，升上A組首位。第一次亮相嘅「大哥」東道主印尼，隨後面對中華台北全場狂攻，以4比0勝出，過埋港隊頭進佔小組次席。
巴勒斯坦上半場雖然長時間掌握控球權，埋門機會亦較多，可惜全無斬獲，更喺13分鐘畀Natphasouk Bounphachan攻破大門，令老撾出乎意料領先1球完半場。易邊後，巴勒斯坦繼續發動進攻，企圖平反敗局，不過由前芽籠聯主帥、新加坡籍教頭黃文慶領軍嘅老撾，苦戰至尾段失守，由83分鐘起喺7分鐘內連失兩球，反輸1比2收場，造就踢多場嘅巴勒斯坦以4分升上A組榜首。
以U21青年國腳為骨幹嘅巴勒斯坦，無疑兩戰不敗係威係勢，但係場場波都似乎有攻勢冇實際，呢4分其實攞得幾吃力吓，正常嚟講香港亞運隊可以睇高一線，問題係過幾日巴勒斯坦會有兩名喺德國、瑞典搵食嘅攻擊球員歸隊，到時可能形勢有變。
印尼其後喺Patriot球場排出4-2-3-1陣式強攻中華台北，可惜前鋒Beto、中場Lilipaly喺14、15分鐘接連錯失黃金機會，下半場中段喺9分鐘內連續3次擊破台北大門，輕勝4比0全取3分，憑較佳得失球排第2位，同分嘅香港隊跌落小組第3，在場嘅印尼球迷都興奮莫名，只不過日本記者就話有苦自己知，因為媒體中心蚊子太多，採訪變成苦事。
東網體育FB同你追實體壇每個精彩時刻！
Follow東網體育IG一齊撐本地運動員！